DILI, 09 setembru 2020 (TATOLI)- Iha primeira semana, loron 1 too loron 9 setembru 2020, Komandu Polísia Nasionál Timor-Leste (PNTL) rejista Timoroan na’in-haat, kompostu husi na’in-rua asidente tráfegu no na’in-rua seluk tara-aan.
Notísia Relevante : Asalta malu iha Tirilolo, ema na’in-lima kanek no uma-lima hetan estragus
Relatóriu ne’ebé fó sai husi Komandu PNTL liuhusi konferénsia imprensa, ohin, iha kuartél jerál PNTL, Caicoli, Dili, katak vítima na’in-rua mate tara-aan ne’e, na’in-ida iha Viqueque no na’in-ida seluk iha Atauro, Dili.
Iha primeiru semana, setembru ne’e, PNTL rejista mós vítima kanek kaman 44 tanba mós asidente tráfegu no halo tratamentu iha ospitál sira.
“Situasaun kona-ba tránzitu nian rejista asidente tráfegu iha territóriu Timor-Leste rejista hamutuk 29. Kazu ne’ebé rezulta ema mate na’in-rua no kanek kaman 44 no balun halo hela tratamentu saúde iha ospitál sira no na’in rua seluk tara-aan rejistu ida husi Viqueque no ida husi Postu Administrativu Atauru, Munisípiu Dili,” informa portavós PNTL, Superintendente Xefe Arnaldo de Araújo.
Bazeia ba rezultadu investigasaun PNTL haktuir asidente hirak ne’e akontese kauza hodi fatór umanu 90%, fatór segundu 5% kondisaun transporte ladún di’ak no fatór seluk kondisaun estrada aat.
Atu evita asidente hirak ne’e, Komandu PNTL Dili liuhusi Departamentu Nasionál Tránzitu no Seguransa Rodoviáriu kontinua alerta no sosializa informasaun ba sidadaun hotu-hotu halo movimentu no viajen ba mai foho atu kuidadu no halai karreta ho neineik.
Kazu na’ok motór akontese maka’as
Iha parte seluk, Superintendente Xefe Arnaldo de Araújo dehan, daudaun ne’e polísia rejista kazu na’ok motór akontese maka’as iha Dili no munisipiu sira.
“Alerta mós ba sidadaun sira atu kuidadu, tanba agora ne’e kazu na’ok motór akontese maka’as iha Dili no munisípiu sira no ami rasik simu ona keixa rua kona-ba motór lakon,” nia hateten.
Daudaun ne’e PNTL Dili halo ona prosesu investigasaun ba motór sira ne’ebé lakon koordena ho PNTL munisípiu 12 hodi halo prosesu kontrolu ne’ebé maka’as.
Jornalista : Eugénio Pereira
Editór : Francisco Simões
