DILI, 09 Setembru 2020 (TATOLI)-Reprezentante Gabinete Primeiru-Ministru (GPM), Filipe da Costa, hala’o sorumutuk ho reprezentante Parnership for Human Development (PHD)/DFAT Timor-Leste no Fundu Nasaun Unida ba Labarik (UNICEF, sigla inglés), hodi diskute kona-ba planu preparasaun ba lansamentu Timor-Leste nia adezaun ba Movimentu Estimulasaun Nutrisaun (SUN Movement–Scalling Up Nutrition) ne’ebé Konsellu Ministru aprova ona iha 02 setembru 2020.
Iha enkontru ezekutivu ne’e, hili Filipe Da Costa no Olinda Dos Reis Albino (Xefe Departamentu Nutrisaun) hosi Ministériu Saúde sai Pontu Fokál iha SUN Movement.
“Ekipa halo enkontru atu ko’alia preparasaun serimónia ruma atu lansa Timor-Leste nia adezaun ba movimentu ne’e, inklui introdús pontu fokál sira ne’ebé Governu sei hili atu halo ligasaun permanente ho Sekretariadu SUN Movement iha Jenebra,” tenik Reprezentante GPM bainhira hala’o sorumutuk ho ekipa, iha sala Gabinete Apoiu Sociedade Civil (GASC), iha Palásiu Governu, kuarta ne’e.
Notísia Relevante: Timor-Leste sei adere ba movimentu nutrisaun estimulante ‘Sun Movement’
Nia esplika, daudaun Governu nomea ona pontu fokál polítiku na’in-ida no pontu fokál tékniku hosi Ministériu Saúde na’in-ida, maibé konfirma ona ho Primeiru-Ministru bele hili pontu fokál tékniku na’in-rua tan.
“Lansamentu ne’e tenke lalais tanba Konsellu Ministru deside ona no iha tempu badak Governu tenke fó sai ona kuadru rezultadu komún iha Loron Ai-han mundiál, atu nune’e ajénsia no parseiru sira bele aliña sira-nia intervensaun,” nia akresenta
Reprezentante GPM diskute mós idea ho ekipa kona-ba nesesidade atu Governu aprova ona estatutu Konsellu Nasionál Seguransa Ai-han no Nutrisaun Timor Leste (KONSSANTIL) atu sai plataforma koordenasaun hodi koordena intervensaun sira ba movimentu ne’e.
SUN Movement estabelese iha tinan 2010 ho vizaun atu forma dalan foun ida ba servisu kolaborasaun entre nasaun membru sira hodi erradika má nutrisaun no membru sira lidera atu unifika parte hotu sai forsa koletivu hodi hadi’ak nutrisaun iha idaidak ninia país.
Jornalista: Florêncio Miranda Ximenes
Editora: Julia Chatarina
