DILI, 09 setembru 2020 (TATOLI)-Magnífiku Reitór Universidade Nasionál Timor Lorosa’e (UNTL), Francisco Miguel Martins, hateten iha posibilidade sei adia serimonia graduasaun ba estudante finalista hamutuk ema na’in 523 ba fulan seluk bainhira la konsege termina preparasaun iha fulan-setembru ne’e.
Tuir loloos serimonia graduasaun sei hala’o iha fulan-setembru 2020.
Notísia Relevante :Finalista UNTL 500 sei gradua iha setembru
“Ami planeia ona atu realiza serimonia graduasaun ba estudante finalista 523 ne’e iha setembru maibé se karik ami-nia preparasaun hotu mak labele determina ba data fiksu ne’e bele adia fali ba fulan seluk maibé iha tinan ne’e,” dehan nia ba Tatoli iha ninia servisu fatin, kuarta ne’e.
Estudante finalista hirak ne’e maihosi fakuldade sia, ho pos mestradu administrasaun institusionál, mestradu polítika jestaun avaliasaun edukasionál, mestradu medisina tropical ba saúde komunitária, espesializasaun pediatria, espesializasaun serúrjia, optamolojia, no medisina familiár.
“Estudante sira ne’e hotu agora daudaun halo hotu ona rejistrasaun hodi hein prosesu graduasaun ne’ebé ita sei realiza iha Sentru Konvensaun Dili (CCD-sigla portugés),” dehan tan.
Notísia Relevante :Finalista UNTL 118 tuir judisium
Jornalista : Tomé Amado
Editór : Agapito dos Santos
