COVALIMA, 09 setembru 2020 (TATOLI)-Diretór Nasionál Farmásia no Medikamentu Ministériu Saúde, Alipio Gusmão, husu ba Servisu Saúde Munisípiu Covalima atu halo promosaun saúde ba komunidade iha baze.
“Ha’u husu ba Diretór Saúde Munisípiu Covalima atu orienta didiak Xefe Sentru Saúde sira hodi nune’e bele iha orariu ba promosaun saúde atuita-nia komunidade bele hetan beniefisiu,” dehan nia bainhira halo distribuisaun ba ekipamentu promosaun saúde iha Suai, kuarta (09/09).
Notísia Relevante :UNICEF ho USAID entrega ekipamentu promosaun saúde ba Covalima
Programa promosaun saúde ne’e importante atu prevene komunidade husi moras hada’et sira no mós fó atendimentu saúde di’ak liután ba komunidade.
Reprezentante Ministériu Saúde ne’e mós no husu ba Administradór Munisípiu Covalima, atu oinsá bele kolabora nafatin ho Ministériu Saúde liliu Servisu Saúde Munisípiu nian hodi dezenvolve setór saúde liliu lori saúde ba hakbesik populasaun to’o iha área remotas.
Ikusliu, nia apela ba Sentru Saúde sira iha Covalima atu uza didi’ak ekipamentu promosaun saúde ne’ebé UNICEF no USAID.
Iha kuarta ne’e, UNICEF no USAID oferese ona fasilidade hamutuk item 14 hanesan projetór, screen, DVD player, televizasaun, estante ba TV, sistema senoru ka sound system, komputadór, mákina imprime, armáriu, kuadru informasaun no utensiliu ne’ebé ho ninia funsaun atu uza ba demostrasaun tein.
Jornalista : Felicidade Ximenes
Editór : Agapito dos Santos
