DILI, 11 setembru 2020 (TATOLI)-Uniaun Europeia (UE) ho kolaborasaun hosi Instituto Camões, I.P, liuhosi programa ‘Osan Povu Nia, Jere ho Di’ak’ ho tema ‘parseria ba melloria prestasaun serbisu hosi reforsa jestaun no supervizaun finansa públika Timor-Leste’ (PFMO-komponente 2) entrega sertifikadu ba ajente sosiedade sivíl hamutuk na’in-12 iha Sentru Kulturál Portugués, Dili.
Formandu hirak ne’e kompleta ona edisaun daruak jornada literasia orsamentál ba sosiedade sivíl, ne’ebé hahú hosi loron 07 to’o 11 setembru, ho totál oras formasaun 20.
“Objetivu hosi formasaun ne’e atu haforsa papél organizasaun sosiedade sivíl sira iha sistema pezu no kontrapezu inklui iha kapasidade halo diálogu no artikulasaun ho Parlamentu Nasionál, Tribunál Konta, Komisaun Antí-korrupsaun, Polísia Sientífika Investigasaun Kriminál, Inspesaun Jerál Estadu, no órgaun komunikasaun sosiál sira,” refere nota ne’ebé Agência Tatoli asesu, sesta ne’e.
Aleinde ne’e, formasaun ne’e atu kapasita organizasaun sosiedade sivíl sira atu dezempeña papél demokrasia, superviziona polítika públika no promove prestasaun servisu no bein públiku sira.
Nune’e mós, ajuda organizasaun naun governamentál sira atu estabelese no uza feramenta prátika ne’ebé bele fó apoiu ba estratejia advokasia no promove mudansa sistemátiku, diálogu no kooperasaun entre órgaun estatál no naun estatál sira.
Embaixadór UE iha Timor-Leste, Andrew Jacobs, hateten ‘Osan Povu Nian’ hanesan programa importante liuhosi UE, ne’ebé la’os de’it tamba valór finanseiru ne’ebé aloka ona ba programa ne’e, maibé tamba konsidera hanesan asuntu importante ba dezenvolvimentu sustentável ekonomia Timór nian.
“Uniaun Europeia fó importánsia maka’as ba kontribuisaun sosiedade sivíl iha supervizaun finansa públika, ba kapasidade atu responsabiliza autoridade sira bainhira nesesáriu no defende interese sidadaun, tamba ne’e mak literasia orsamentál importante tebes,” subliña Embaixadór.
Formadora Fernanda Borges, konsidera formasaun ba supervizaun finansa públika hanesan área relevante ba dezenvolvimentu no demokrasia, ne’ebé papél sosiedade sivíl importante tebes.
Projetu ne’e, kofinansiadu hosi UE ho valór €12.000 no kofinansiadu no jestaun hosi Instituto Camões ho valór €600.000.
Programa ne’e prevee iha ámbitu semináriu kapasitasaun ba fortalesimentu ajente sosiedade sivíl sira, ne’ebé inklui komponente rua fokadu ba apoiu no reforsu sistema pezu no kontrapezu interveniente estatál no naun estatál, fortalesimentu partisipasaun entidade nasionál sira iha prosesu foti desizaun no supervizaun finansa públika, ho objektivu atu hadi’a prestasaun serbisu públiku.
Jornalista: Antónia Gusmão
Editora: Julia Chatarina
