DILI, 14 setembru 2020 (TATOLI)-Sekretaria Estadu Formasaun Profisionál no Empregu (SEFOPE) fó teste ba funsionáriu kazuál SEFOPE hamutuk na’in-225 hodi promove ba ajente administrasaun públika.
Tuir Sekretáriu Estadu Formasaun Profisionál no Empregu, Alarico do Rosário, funsionáriu kazuál iha Sekretaria Estadu ne’e barak tebes, tanba ne’e hafoin konsultasaun halo desizaun.
“SEFOPE anterior tuur hamutuk hodi ko’alia no halo konsultasaun ba Komisaun Funsaun Públika atu fó dalan ho objetivu atu halo teste ba funsionáriu kazuál ba ajente administrasaun. Funsionáriu kazuál ne’ebé tuir teste hamutuk 225,” tenik Sekretáriu Estadu ne’e iha salaun INFORDEPE, Balide, bainhira partisipa seremonia teste ba funsionáriu kazuál, segunda ne’e.
Funsionáriu ne’ebé tuir teste sei selesiona balun hodi promove ba ajente administrasaun públika, maibé tuir governante ne’e depende ba teste ne’e rasik tanba bainhira priense rekezitu maka foin halo promosaun ba ajente administrasaun no ba sira ne’ebé la liu vaga sei nafatin hanesan funsionáriu kazuál SEFOPE.
“Ita hili de’it ne’e ladi’ak, ita tenke loke teste hodi sira bele tuir vaga, nune’e bele hatene se maka liu no se maka la liu,” nia akresenta.
Matéria ba teste kuaze maihosi koñesimentu jerál no materiál administrasaun públika nia no rezultadu teste ba funsionáriu kazuál SEFOPE sei públika iha tinan ne’e nia laran.
Iha fatin hanesan, Diretór Jerál Administrasaun Finansa SEFOPE, José Asa, hateten teste ba funsionáriu kazuál parte SEFOPE planeadu kleur ona no prevee ona iha Orsamentu Jerál Estadu (OJE) 2020 maibé foin bele realiza.
Nia dehan, funsionáriu SEFOPE na’in 225 ne’ebé tuir teste sei selesiona de’it ema na’in-128 maka promeve ba ajente administrasaun públika no funsionáriu SEFOPE kazuál na’in-115 ne’ebé la liu vaga ne’e, sei kontinua loke vaga hanesan.
Funsionáriu ne’ebé tuir atividade ne’e maihusi 12 munisípiu la inklui Rejiaun Administrativa Espesiál Oé-cusse Ambeno (RAEOA).
Jornalista: Natalino Costa
Editora: Julia Chatarina
