DILI, 15 setembru 2020 (TATOLI)-Ministra Negósiu Estranjeiru no Kooperasaun (MNEK), Adaljiza Magno, hateten iha reuniaun Konsellu Ministru iha kuarta (16/09) aban, Governu sei halo aprovasaun ba alterasaun lei kona-ba pagamentu subsídiu faze daruak nian ba estudante naun bolseiru 500-resin iha nasaun hitu relasiona ho implementasaun Estadu Emerjénsia tanba COVID-19.
“Aban mak ami foin halo aprovasaun ba alterasaun lei, foin bele halo pagamentu faze daruak ba estudante iha nasaun hitu nian,” dehan Adaljiza Magno, ba Tatoli iha Parlamentu Nasionál, tersa ne’e.
Notísia Relevante :Governu sei selu tan subsídiu ba Timoroan iha nasaun hitu
Estudante naun bolseiru 500-resin, oras ne’e estuda iha nasaun Repúblika Populár Banglades, Reinu Béljica, Repúblika Populár Xina, Repúblika Koreia Súl, Reinu Unidu da Grã-Británia no Irlánda Norte, Repúblika Mozambique no Singapura.
Estudante Timoroan hirak ne’e naran la tama lista iha pagamentu subsídiu faze dahuluk nian.
Iha pagamentu faze dahuluk nian, Governu aloka millaun $ 2, hodi halo pagamentu ba estudante naun bolseiru hamutuk 2.000-resin ne’ebé estuda iha Áfrika, Ázia, Filipina, Indonézia, Austrália, Europeia, Amérika no seluk tan.
Entretantu, benefisiáriu sira ne’ebé naran tama iha lista maibé la konsege simu sira-nia diretu iha pagamentu faze dahuluk nian, iha segunda (14/09), Komisaun COVID-19 halo ona aprovasaun nune’e bele halo ona transferénsia ba konta bankaria estudante idaidak.
Notísia Relevante :Estudante Naun Bolseiru iha Portugal Simu Ona Subsídiu
Jornalista : Hortencio Sanchez
Editór : Agapito dos Santos
