DILI, 17 setembru 2020 (TATOLI)-Feto Timoroan hamutuk ema na’in 400 sofre moras kankru susun iha Timor-Leste, hahú husi 2015-2020, divulga relatóriu Ospitál Nasionál Guido Valadares (HNGV-sigla portugés).
Xefe Departementu Sirúrjia HNGV, Alito Soares, hateten husi númeru ne’e pursentu 50 mai halo tratamentu ho kondisaun grave tanba kategoria estadium tolu no haat hodi da’et ona ba orgaun seluk hanesan pulmaun, aten, ruin no kakutak.
Notísia Relevante :Sintoma Kankru Susun Feto Barak Sofre Ona
”Ema ne’ebé mak sofre ona ba kankru susun durante ne’e ha’u fó persentajen kankru susun ho kankru seluk ne’ebé mak maioria mai iha HNGV 50% mai ho avanzadu ona,” dehan Alito soares, ba jornalista sira iha HNGV, kinta ne’e.
Husi númeru ne’e pursentu 80 (%) la konsege rekupera ka mate tanba mai halo tratamentu ho kondisaun grave ona.
”Pasiente sira ne’ebé mak moras kankru susun ne’e mai ho idade 19 to’o 40 resin mak sofre,” nia esplika.
Kankru susun ne’e fatór ida maihosi jenétika familia liliu inan ida kona moras refere fasil atu da’et mós ba oan feto, fatór seluk maka hahán kímiku sira risku mós ba feto sira atu hetan moras kankru susun.
”Hahán ne’ebé mak daudaun ita-nia komunidade konsumu ne’e la saudavel iha kímiku ne’ebé mak barak entaun kankru ne’e kauza husi hahán mos bele kontiudu hormon, kontiudu kímiku ne’ebé selula iha ita-nia isin no selulár ne’e forma sai filafali kankru,” katak nia.
Notísia Relevante :Livre Hosi Kankru Susun, Labele Moe Ko’alia ba Malu
Jornalista : Felicidade Ximenes
Editór : Agapito dos Santos
