DILI, 17 setembru 2020 (TATOLI)-Fundu Dezenvolvimentu Kapitál Umanu (FDCH-sigla portugés), daudaun ne’e fasilita ona estudante bolseiru hamutuk 120 hodi halo estájiu profesionál iha instituisaun públiku no privadu tanba antes ne’e ramata ona estudu iha rai-liur.
Estáziu profesionál ne’e hala’o durante fulan neen hodi hasa’e abilidade estudante iha kona-ba servisu públiku no privada iha Timor-Leste.
Notísia Relevante :MESSK re-integra bolseiru 26 ba MAP
Diretora Ezekutivu FDCH, Leila Carseres dos Santos, hateten objetivu husi estáziu profesional ne’e obriga estudante sira aprende ho seriu para bele hetan esperiénsia no mós manán konfiansa husi instituisaun relevante atu emprega bolseiru sira iha futuru.
Tuir kontratu ne’ebé maka FDCH halo estudante bolseiru sira la fó saláriu maibé oferese de’it insentivu kada fulan $ 100 hodi selu transporte no hahán.
“Iha termu kontratu ne’e ami ejize sira kada fulan tenki hatama relatóriu pesoál depois ami mós halo koordenasaun ho ministériu no instituisaun privadu sira atu apoiu mós relatóriu mai FDCH hodi reforsa estajiáriu sira nia estájiu profesionál ne’e,” dehan nia ba jornalista sira iha edifísiu MESSK Colmera Dili, kinta ne’e.
Nia dehan, programa ne’e implementa di’ak tanba iha koordenasaun diak entre FDCH ho instituisaun relevantes sira.
“Ha’u fó ezemplu ida mak iha Institutu Petróliu no Jeolojia ita koloka estajiáriu na’in 10 iha ne’ebá, entaun IPJ enkaixa tiha sira na’in 10 ne’e iha sira-nia programa ba Munisípiu kona-ba estudu nian,” nia esplika.
Notísia Relevante :FDCH Implementa Programa Estájiu Profesionál Ba Bolseiru Graduadu
Jornalista : Tomé Amado
Editór : Agapito dos Santos
