DILI 21 setembru 2020 (TATOLI)-Diretór Empregu Exteriór hosi Sekretaria Estadu Formasaun Profisionál no Empregu (SEFOPE), Filomeno Soares, informa traballadór timor-oan ne’ebé serbisu iha Austrália ba programa seasonal worker iha tinan ualu nia-laran, konsege kontribui ona millaun $18.
“Totál orsamentu ne’ebé maka traballadór sira lori mai Timor-Leste hodi dezenvolve sira-nia família, hahú iha tinan 2012 to’o 2020 hamutuk $18.220.000,77,” dehan Dirijente ne’e iha ámbitu abertura teste fíziku ba kandidatu traballadór timor-oan hosi munisípiu Dili hamutuk na’in-9.000, ne’ebé sei ba serbisu iha Austrália, iha Sentru Formasaun Polísia (CFP, sigla portugés), Comoro, segunda ne’e.
Traballadór sira hosi Austrália durante ne’e mai informa iha parte Diresaun Nasionál Empregu Exteriór SEFOPE.
“Dadus ne’e ami hetan hosi traballdór sira, bainhira sira fila hosi Austrália, sira rasik ba infoma iha diresaun no ami rejista,” Nia akresenta.
Daudaun ne’e traballadór timor-oan hamutuk 1.100 maka servisu iha Austrália.
Tuir dadus hosi SEFOPE, iha tinan 2014 to’o 2018, timor-oan hamutuk 2.819 maka serbisu ona iha Austrália liuhosi programa Seasonal Worker iha área ospitalidade no ortikultura no konsege rekolla retornu milliaun $9.698.579,15 mai Timor-Leste.
Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, 2017 na’in-782, 2018 ema na’in-1.380 no 2019 ema lima.
Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun servisu repetidu to’o dala haat hafoin kompleta servisu ho durasaun fulan-neen, bazea ba prestasaun servisu traballadór iha kompañia sira.
Jornalista: Natalino Costa
Editora: Julia Chatarina
