DILI, 22 setembru 2020 (TATOLI)-Governu liuhosi Ministériu Turizmu, Komérsiu no Indústria (MTKI) ofisialmente loke espozisaun ho tema ‘hau-nia Timor-Leste’, ne’ebé realiza ho apoiu hosi USAID’s Tourism For All Project, asosiasaun turizmu no empreza turizmu sira, iha ámbitu atu komemorasaun loron mundiál turizmu iha loron 27 setembru.
Iha ámbitu ne’e, Governu liuhosi MTKI hakarak halo promosaun ba turizmu doméstiku ho intensaun daudaun ne’e nasaun sira hotu kuaze taka aeroportu hodi labele halo viajen.
Programa ne’e realiza durante loron-lima, hahú 22 to’o 26 setembru iha Timor Plaza Centre Court hahú tuku 10 dadeer to’o tuku 16:00 lorokraik.
Iha intervensaun Ministru Turizmu, Komérsiu no Indústria, José Lucas do Carmo da Silva, konsidera eventu ne’e atu reitera filafali importánsia papél parseiru sira iha dezenvolvimentu, liuliu iha área turizmu.
“Iha turizmu Governu la la’o mesak maibé hamutuk ho parseiru, ambiente ne’e maka durante ne’e la’o. Timor-oan sorte boot tanba maski ho situasaun COVID-19 maibé sempre iha oportunidade mai ita atu dezenvolve área prioritáriu sira,” tenik Ministru José Lucas, iha Timor Plaza Centre Court, tersa ne’e.
Notísia Relevante: Komemora loron mundiál turizmu, Timor-Leste hakarak promove turizmu doméstiku
Governante ne’e dehan, ho kolaborasaun parseiru sira, liafuan ‘hau-nia Timor-Leste’ bolu ema hotu nia konsiénsia.
“Mosu hanoin ida katak turizmu ne’e ita hotu nian, la’ós ema ida nian de’it,” nia fó hanoin.
Sorin seluk, Diretór Jerál Turizmu MTKI, José Filipe Dias Quintas, hateten ministériu ho kolaborasaun parseiru hanesan USAID kontinua promove turizmu doméstiku.
“Ho situasaun COVID-19 indústria turizmu hasoru dezafíu boot, la’ós de’it ba Timor-Leste maibé mós globalmente, entaun ita serbisu hamutuk parseiru dezenvolvimentu sira atu hahú promove turizmu rai-laran liuhosi eventu espozisaun no seluk tan,” nia dehan.
Iha eventu ne’e, setór privadu sira halo promosaun ba timor-oan no estranjeiru sira bele halo viajen ba munisípiu sira.
“Sira bele sosa pakote ne’ebé ajénsia turizmu sira prepara ona, tanba daudaun nasaun hotu kuaze taka aeroportu, sira labele mai ita no ita labele ba sira.
Tanba ne’e Governu hanoin atu dezenvolve no promove turizmu doméstiku liuhosi liña ministeriál, parseiru dezenvolvimentu no setór privadu sira.
Iha programa durante loron lima ne’e, Asosiasaun hotelaria Timor-Leste (AHTL) promove otél sira iha rai-laran.
Empreza sira aproveita espozisaun ne’e hodi promove pakote ne’ebé sira dezeña ona no konvida turizta sira tantu doméstiku no estranjeiru atu vizita fatin tur’istiku sira iha munisípiu sira.
“Iha munisípiu ia iha fatin barak hanesan bee-manas Marobom illa Jaco, Ramelau, foho Matebian no seluk tan, maibé téknikamente ami sei haree hosi konteksu infraestrutura atu hahú hadi’a fatin turizmu hotu tanba ema hakarak halo viaen ba munisípiu maibé alojamentu maka ita presiza haree ho di’ak,” nia subliña.
Entretantu. patrosinadór sira ba eventu ne’e maka hanesan MTKI, USAID, Asosiasaun Hotelaria Timor-Leste, Timor Plaza, Phone House, TL Sport, CeMill Group, East Timor Trading Group, Yellow Tail, Bintang, Telkomcel, Timor Telecom, Hotel Timor, Air Timor, Pelican Paradise, ANZ, Telemor, no Hotel Novo Turismo.
Jornalista: Natalino Costa
Editora: Julia Chatarina
