DILI, 26 setembru 2020 (TATOLI)-Iha diskusaun Komité Revizaun Orsamentu Polítika (KROP) ba proposta Orsamentu Jerál Estadu (OJE) finan fiskál 2021, Prezidénsia Konsellu Ministru (PCM, sigla portugés) husu orsamentu adisionál milliaun $1,8 hosi tetu orijinál milliaun $4-resin, ne’ebé atribui hosi Ministrériu Finansa (MF).
Ministru Prezidénsia Konsellu Ministru, Fidelis Manuel Leite Magalhães, hateten razaun husu adisionál tanba presiza halo jestaun di’ak liután iha Palásiu Governu iha tinan 2021.
“Orsamentu adisionál ne’ebé ami husu atu halo jestaun ba Palásiu Governu, kustu eletrisidade, inklui finansia gabinete foun sira ne’ebé mak harii iha gabinete PCM nia okos,” relata Ministru Fidelis, hafoin ramata diskusaun KROP iha salaun MF, Aitarak-laran, sábadu ne’e.
Gabinete foun ne’ebé estabelese iha gabinete PCM mak hanesan Gabinete Reforma Administrativa, Gabinete Tradusaun, no Compact Development Team.
“Gabinete foun tolu ne’e importante tebes hodi fó apoia di’ak liután ba funsionamentu PCM,” nia reforsa.
Aleinde ne’e, PCM iha knaar importante ne’ebé maka koajuva Primeiru-Ministru.
“Koajuva Primeiru-Ministru iha koordenasaun jerál ho Governu nian no halo koordenasaun serbisu governasaun ba instituisaun Estadu hotu,” nia akresenta.
Nune’e mós, hadi’a kualidade desizaun Konsellu Ministru nian, tanba desizaun ezekutivu sira labele halo deliberasaun sein iha analiza kle’an ba proposta ne’ebé submete ona.
Jornalista: Antónia Gusmão
Editora: Julia Chatarina
