DILI, 30 setembru 2020 (TATOLI)—Instituisaun Estadu sira inklui Sekretaria Estadu Kooperativa (SEKoop) hahú identifika produtu atu halo aprezentasaun iha Expo Dubai, ne’ebé tuir ajenda sei realiza durante fulan-neen, hahú outubru 2021 to’o marsu 2022.
Sekretáriu Estadu Kooperativa, Elizário Fereira, hateten produtu kooperativa ne’ebé SEKoop identifika no hakarak propoin halo promosaun iha espozisaun mundiál ne’e maka bani-been.
“Bazeia ba komisaun Expo Dubai Ministériu Turizmu Komérsiu no Indústria (MTKI), kada ministériu ka instituisaun Estadu bele prepara produtu ida-idak. Agora hosi parte ami-nia, desde inísiu SEKoop ninia produtu atu lori maka bani-been,” dehan Sekretáriu Estadu Elizário ba Agência Tatoli iha edifísiu Akait, kuarta ne’e.
Tanba ne’e, daudaun SEKoop mobiliza hela grupu kooperativa ne’ebé prodús produtu orgánika ne’e hodi fasilita.
“Ami husu ema hotu bele sai produtór bani-been no la’ós de’it produtu ne’e maibé produtu seluk ne’ebé maka bele asegura kontribui hadi’a kualidade ai-han no mós kualidade nutrisaun iha ita-nian rai-laran,” nia fó hanoin.
Iha postu administrativu Laclubar, munisípiu Manatuto iha produtór ne’ebé hakiak bani iha ai no fatuk hodi prodús bani-been.
Folin produtu orgánika Timór ne’e iha merkadu ba litru lima $25.
Antes espozisaun mundiál ne’e adia, Timor-Leste haruka ona lista produtu ba komisaun organizadora no produtu ne’ebé maka konsege hetan ona sertifikasaun maka kafé, mina-nú, mina-kamii, artezenatu, mármore no produtu seluk tan.
Daudaun, komisaun Expo Dubai 2021 tutela ba Ministériu Turizmu, Komérsiu no Indústria (MTKI) , ne’ebé antes ne’e iha Gabinete Primeiru-Ministru (GPM).
Governu Emiradu Árabe Unidu (EAU) deside adia espozisaun, ne’ebé tuir oráriu eventu mundiál ne’e sei realiza iha outubru 2020, maibé muda ba 2021 tanba pandemia COVID-19.
Iha área espozisaun, Timor-Leste hetan ona espasu halo aprezentasaun produtu iha espozisaun ho luan metru 250, ne’ebé oferese gratuita no apartementu inklui viza ba ema importante atu partisipa iha eventu ne’e.
Eventu mundiál ne’e okupa rai ektare 438 iha Dubai Exhibition Center no sei partisipa husi nasaun 192 inklui Timor-Leste.
Antes ne’e, Governu deside aloka orsamentu millaun $2,1 liuhosi verba orsamentu GPM hodi partisipa eventu mundiál ne’e maibé hafoin mudansa ba responsável espozisaun ne’e, maka sei iha mudansa.
Jornalista: Natalino Costa
Editora: Julia Chatarina
