MACLN identifika tan dokumentu veteranu falsu 3000-resin
DILI, 01 outubru 2020 (TATOLI)-Prezidente Konsellu Veteranu, Vidal de Jesus “Riak Leman’’ informa, daudaun ne’e Ministériu Asuntu Kombatente Libertasaun Nasionál (MACLN) identifika tan dokumentu veteranu falsu hamutuk na’in-3000-resin.
“Lista falsifikasaun dokumentu veteranu tama ona iha Ministériu Asuntu Kombatente Libertasaun Nasionál hamutuk ema na’in-3000-resin hosi territóriu nasionál,” informa Vidal de Jesus ‘’Riak Leman’’ ba Agência Tatoli, iha nia kna’ar fatin, Matadouru, Dili, kuarta ne’e.
Notísia Relevante : Lista veteranu falsu na’in-500-resin ba ona Ministériu Públiku
Nia hateten, lista veteranu falsu ne’e deskonfia iha indísiu benefisiáriu sira halo falsifikasaun ba dokumentu hodi sai veteranu no martir hodi hetan pensaun hosi Estadu no naran sira-ne’e ministériu simu keixa hosi veteranu no komunidade balun hahú hosi 2012 to’o mai agora.
Riak Leman dehan, iha lista naran 500-resin mak parte inspektór ministériu nian finaliza nia investigasaun hodi haruka ba Ministériu Públiku (MP) prosesa tuir lei ne’ebé vigora. Tanba ne’e nia hatutan, hosi lista 3000-resin ne’ebé daudaun parte Ministériu Asuntu Kombatente Libertasaun Nasionál koopera ho Polísia Sientífika Investigasaun Kriminál ba prosesu investigasaun la’o hela bainhira finaliza bele kanaliza ba MP.
Mezmu hosi lista ne’ebé deskonfia iha falsifikasaun antes ne’e sira simu ona pensaun kada fulan hosi Estadu, maibé hafoin Ministériu Asuntu Kombatente Libertasaun Nasionál (MACLN) identifika hodi deside hapara pensaun.
“Ministériu hein ema hirak ne’e nia reklamasaun, maibé iha situasaun ne’e to’o agora laiha ema ida mak mai halo reklamasaun,” Riak Leman hateten.
Jornalista : Nelson de Sousa
Editór : Francisco Simões
