DILI, 02 outubru 2020 (TATOLI)–Governu planeia ona atu halo mapamentu eletróniku ba projetu infraestrutura nune’e Governu bele kontrola projetu ninia ezekusaun iha terrenu.
Inisiativa ne’e tanba Primeiru-Ministru (PM), Taur Matan Ruak, preokupa ho implementasaun projetu infraestutura.
“Projetu sai preokupasaun ba ema hotu inklui deputadu sira, kada tinan as vezes ita deskobre obra ida kontratu laiha, tanba ne’e ha’u husu ona ba Vise Primeiru-Ministru, José dos Reis atu hatama hotu projetu iha Timór laran ne’e iha mapamentu eletróniku, bainhira hotu ha’u sei hatudu ba deputadu sira,” hateten Xefe Governu iha diskusaun faze jeneralidade ba Proposta Orsamentu Jerál Estadu (OJE) 2020 ba loron daruak, iha sala plenáriu, Parlamentu Nasionál (PN), sesta ne’e.
Iha tinan neen nia laran Governu gasta ona orsamentu hamutuk millaun $170-resin ba projetu infraestrutura sira.
“Tinan 2010 to’o 2016 gasta ona millaun $170-resin ba projetu sira. Kada tinan sempre aloka osan hodi inflasiona infraestrutura maibé nunka rezolve problema setór privadu. Dala ruma projetu rua ka tolu hamutuk iha fatin ida de’it maibé osan tau ketak-ketak, tanba ne’e ha’u presiza apoiu Parlamentu tanba iha ona esperiénsia di’ak iha tempu ne’ebé ha’u sai Prezidente Repúblika,” nia informa.
Tuir Xefe Ezekutivu, entidade hotu presiza asume kontribui tuir knaar ne’ebé iha atu rezolve implementasaun projetu infraestrutura iha terrenu.
“Ami labele lori todan ne’e mesak, ami oituan de’it no Governu hakarak kontribui solusiona problema ne’ebé la’ós oituan maibé barak tanba ita lakon kontrolu, tanba ne’e hakarak husu apoiu Parlamentu nian,” PM akresenta.
Nia rekoñese, maski eziste ona lejizlasaun barak maibé seidauk konsege rezolve preblema setór privadu.
“Setór emprezariál ita-nia lei sira la ajuda sira, konkursu internasionál millaun $1 ba leten, hafoin tinan 20 setór privadu Timór nian seidauk iha kapasidade atu kompete mesak tanba halo lei hodi taka dalan ba sira. Ha’u-nia pergunta tanba sá la loke jogu livre hodi hotu-hotu bele partisipa,” nia preokupa.
Xefe Governu konsidera, halo alterasaun ba lejizsaun presiza ema hotu ninia kontribuisaun.
“Ita-nia problema maka reforma administrasaun públika, reforma judisiaria, finansa públika, ne’ebé la’ós problema Governu nian mesak maibé hotu-hotu ninian. Ha’u hakarak ita hamutuk tanba problema Governu barak, dala ruma ita koa’lia buat kiik-oan maibé boot liu ita la ko’alia,” PM Taur fó hanoin.
Entre tinan 2011 to’o 2020 aprova ona biliaun $4,8 ne’ebé destina hodi finansia projetu infraestrutura (inklui empréstimu esternu) no hosi montante ne’e ezekuta ona porsentu 63 ne’ebé korresponde ho biliaun $3.
Jornalista: Antónia Gusmão
Editora: Julia Chatarina
