DILI, 03 outobru 2020 (TATOLI)-Prezidente Konsellu Imprensa (CI-sigla portugés), Virgílio da Silva Guterres, orgullu ho ezisténsia Asosiasaun Jornalista Desportu Timor-Leste (AJORSTIL), tanba bele fó importánsia ba imformasaun iha área desportu nian.
“Ha’u kontente tebes ho imi nia ejistensia, tenke metin nafatin ba oin, dalabarak ema ida rua tuur hamutuk bele ko’alia harii ona asosiasaun ida maibé atu hakat ba oin mak sai dezafiu, fiar katak imi sei hakat nafatin bá-oin hodi tau importánsia ba notísia desportu hotu iha nasaun ne’e,” nia dehan iha ninia intervensaun durante kongresu dahuluk AJORSTIL, iha Salaun Xanana Sport Centre, sábadu ne’e.
Notísia Relevante :Evangelisto eleitu ba Prezidente AJORSTIL
Nia enkoraza ba membru organizasaun ne’e atu hato’o informasaun ho loloos ba públiku kona-ba desportu.
“Agora populasaun baruk ona ho notísia polítika sira ne’ebé bosok mak barak, selok malu mak barak, populasaun barak gosta fali mak atu asiste notísia bola ne’ebé ho realidade halo sira kontente, tan ne’e ita boot sira tenke avansa ba oin,” nia hateten.
Iha fatin hanesan Sekretáriu Jerál Federasaun Futeból Timor-Leste (FFTL), Nelio Isaac Sarmento, hateten dala barak akontese iha mídia nasionál sira ladun tau importansia ba notísia desportu.
Tanba ne’e, nia dehan ho prezensa AJORSTIL nian sei responde nesesidade públiku nian liga ho desportu.
“Desportu atu naran bo’ot iha mundu lori ita boot sira jornalista Lionel Messi, Cristiano Ronaldo naran boot tanba mídia, ne’ebé ha’u haree iha jornal sira headline ne’e nunka hetan notísia desportu, hetan de’it mak notísia polítika, ida ne’e labele ita mós tenke promove notísia desportu sira,” nia dehan.
Jornalista: Hortencio Sanchez
Editór :Agapito dos Santos
