DILI, 05 outubru 2020 (TATOLI)-Sentru Saúde Becora (SSB) hahú tinan 2011 to’o agora sei kontinua enfrenta falta ekipamentu saúde orál atu fó tratamentu ba pasiente nehan sira.
Ekipamentu saúde orál ne’ebé baibain profisionál saúde orál sira uza maka hanesan cadeira odontolójika, pedál komandu, meza ekipu, kompresór odontolójiku, fotopolimerizadór, autoklave odontolójika, raiu X odontolójiku, jatu bikarbonatu ka kaneta ultrason no seluk tan.
Notísia Relevante :Kuidadu Saúde Orál, Kose Nehan Loron Ida Dala Rua
Xefe Sentru Saúde Becora, Adelina Pinto, hateten durante ne’e, nia parte labele atende pasiente sira ho problema odontolójiku ka nehan, hodi nune’e maka enkamiña sira bá halo tratamentu iha Ospitál Nasionál Guido Valadares (HNGV-sigla portugés) Dili.
”Ekipamentu orál nian até agora ami seidauk rezolve tanba ami-nia meza sira aat hotu liliu ekipamentu ba fokit nehan nian no mós reazentes inklui ai-moruk atu bius nehan hodi fokit nehan mos laiha entaun saúde orál ne’e mak sai problema ba ami tanba husi tinan ba tinan seidauk rezolve maibé solusaun laiha,” Ezekutiva Adelina Pinto, dehan ba Agência Tatoli, iha Becora, segunda ne’e.
Aleinde falta ekipamentu, tuir nia, laiha aimoruk anestezia iha Sentru Saúde Becora atu halo atendimentu ba moras nehan ka pasiente ho problema odontolójiku.
”Pedidu ami halo ba Munsípiu Dili mós to’o agora seidauk rezolve no ekipamentu fokit nehan ne’e iha rua, maibé ida avaria dezde 2011 ne’ebé mak ha’u mai halo servisu iha ne’e no ida seluk ne’e mós di’ak maibé kondisaun ba fokit nehan ba kazu ne’ebé mak kmaan maibé kazu ne’ebé mak todan labele rezolve entaun ami transfere ba HNGV,” nia relata.
Notísia Relevante :SAMES halo diskusaun ho profisionál Saúde sira iha área dentária
Jornalista :Felicidade Ximenes
Editór :Agapito dos Santos
