DILI, 06 outubru 2020 (TATOLI)-Deputada husi Bankada Partidu Demokrátiku (PD), Elvina Sousa, husu ba Ministériu Edukasaun Juventude no Desportu (MEJD) atu garante ambiente ida seguru ba estudante sira liliu prevene mosu konflitu iha areadór eskola públiku iha territóriu Timor-Leste.
“Ha’u haree iha sosiál média ikus-ikus ne’e mosu violénsia iha eskola sira, estudante versus estudante, estudante versus profesór no profesór versus inan-aman sira, tan ne’e, Ministériu Edukasaun iha dever tomak atu asegura situasaun sira ne’e,” nia hateten asuntu ne’e durante diskusaun espesialidade ba OJE 2020 iha Parlamentu Nasionál, tersa ne’e.
Notísia Relevante :PNTL Detein Estudante Eskola 10 Dezembru Na’in 22
Eskola, fatin atu aprende tanba ne’e, nia dehan Governu liuhosi MEJD tenki kria polítika di’ak hodi regulariza estudante no profesór sira hodi kontribui ba ambiente ida seguru, livre husi kualker violénsia no konflitu.
Hatán ba preokupasaun Deputada ne’e, Ministru Edukasaun Juventude no Desportu, Armindo Maia, hateten Governu kria ona regra kona-ba zero toleránsia ba violénsia iha eskola sira.
Maibé Governante ne’e rekoñese katak dalabarak kazu ne’e sei kontinua akontese iha prátika lorloron.
“Agora saida mak presiza halo atu violénsia ne’e labele akontese iha eskola sira, presiza envolvimentu ema hotu nian tantu komunidade, polísia, inan-aman inklui Ministériu rasik,” nia dehan.
MEJD daudaun ne’e, identifika hela eskola públiku sira iha Kapitál Dili ne’ebé sempre mosu problema atu nune’e bele rezolve ho dalan ida maka muda eskola sira ne’e ba fatin seluk.
Notísia Relevante :MEJD Husu Estudante FINANTIL ho 10 Dezembru Kria Estabilidade
Jornalista : Tomé Amado
Editór :Agapito dos Santos
