DILI, 08 outubru 2020 (TATOLI) — Parlamentu Nasionál, ohin, aprova ona proposta despeza Orsamentu Jerál Estadu (OJE) 2020 ho montante biliaun $1.497,1 iha finál globál ho rezultadu votasaun a-favór 43, kontra 21 no abstensaun 1.
“Ho nune’e proposta-lei orsamentu 2020 pasa iha finál globál iha Parlamentu Nasionál tanba aprovadu ona, ha’u husu ba komisaun C (Finansa públika) bele rezolve ona redasaun finál orsida lokraik no aban ita bele haruka ba Prezidente Repúblika”, Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi debate espesialidade loron ikus, iha plenária, kinta ne’e.
Despeza ba tinan fiskál 2020 biliaun $1.497,1, ne’ebé prevé ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.
Hosi montante orsamentu biliun $1.496,1 gasta ona balun, hahú hosi janeiru to’o setembru liuhosi Dotasaun Temporária Orsamentál (DOT) no restu orsamentu ezekuta ba fulan outubru, novembru no dezembru 2020.
Totál despeza ba Orsamentu Jerál Estadu 2020 biliaun $1,497.1 (la inklui atividade ne’ebé finánsia hosi doadór sira ho valór millaun $184.0, liu 1.0% kompara ho orsamentu 2019 nian.
Timor‐Leste iha rejime duodesimál (DOT) durante tinan 2020 nia laran, tanba orsamentu la aprova tuir kalendáriu regulár ne’ebé iha. Limite de’it ba 1/12 hosi orsamentu orijinál tinan kotuk maka bele fahe kada fulan. Ida-ne’e signifika, funsaun esénsial Governu nian bele kontinua maibé polítika balun ne’ebé fora hosi atividade anuál labele implementa, inklui projetu infra-estrutura importante balun. Iha proposta OJE, alokasaun ba kapitál minór no kapitál dezenvolvimentu sei aumenta iha últimu mes hosi orsamentu la’ós DOT 2020, nomos inklui ona millaun $220.2 ba Fundu Covid‐19 atu responde servisu saúde no rekuperasaun ekonómika.
Montante orsamentu biliaun $1.497,1 foti hosi fundu petrolíferu millaun $963,9. Montante orsamentu ne’e Rendimentu Sustentável Estimadu (RSE) millaun $544,4 no transferénsia superiór RSE millaun $419,5.
Entretantu reseita naun-petrolífera millaun $770.6 kompostu hosi reseita tributária millaun $165,0, reseita própria millaun $6,8, doasaun millaun $10,7, jurus millaun $0,5, saldo jerénsia millaun $527,6 no empréstimu millaun $60,0.
Hakarak fó lembra katak, iha loron 3 dezembru 2019 governu deside retira proposta OJE 2020 ho montante biliaun $1.995 iha faze jeneralidade loron daruak, tanba la estruturadu no inskonstitusionál.
Nune’e Governu kumpri rekomendasaun PN nian hodi redúz ba biliaun $1,668. Proposta ne’e governu aprezenta hikas ba Parlamentu Nasionál iha 19 dezembru 2019.
Nune’e PN hahú debate iha loron 15,16 no 17 fevereiru 2020, maibé iha loron ikus faze espesialidade orsamentu ne’e la pasa ho rezultadu votasaun a-favór 13, kontra 15 no abstensaun 25.
Jornalista: Evaristo Soares Martins
Editór: Cancio Ximenes
