DILI, 13 outubru 2020 (TATOLI)–Loron 20 outubru nu’udár loron mundiál estatístika, tanba ne’e atu kememora loron importante ne’e maka Diresaun Jerál Estatistika (DGE, sigla portugés) Ministériu Finansa realiza atividade desportiva.
“Antes atu tama ba loron espesiál ne’e, ami diresaun jerál estatístika realiza atividade desportiva jogu entre funsionáriu,” hateten Diretór Jerál Estatístika, Elias Ferreira, iha resintu DGE, Caicoli, tersa ne’e.
Jogu desportivu ne’ebé hala’o ho tipu jogu futsál no mós dada tali entre funsionáriu DGE no atividade ne’e hahú ohin no sei ramata iha segunda (19/10).
Iha ámbitu komemorasaun loron mundiál ne’e, diresaun mós sei halo lansamentu ba relatóriu tolu hanesan konta nasionál 2019, dadus komérsiu 2019 no mós Índise Presu Konsumidór (IPK) setembru 2020.
“Hafoin lansa relatóriu importante tolu ne’e, ami sei relata ba estatístika nasaun unida katak maski iha situasaun COVID-19 iha mundu no Timor-Leste maibé diresaun jerál estatístika hala’o nafatin eventu importante hodi publika dadus sira ne’e hodi halo dezenvolvimentu ba país,” nia akresenta.
Aleinde ne’e, sei realiza mós misa agradesimentu ne’ebé sei akontese iha tersa (20/10) no sai misa funsionáriu sira sei tau ai-funan no ramata ho avaliasaun serbisu.
Iha kememorasaun loron mundiál ne’e, DGE sei konvida entidade hotu, liuliu parseiru dezenvolvimentu, akadémiku, sosiedade sivíl, ONG nasionál, no relatóriu ne’e sei lansa hosi Vise Ministra Finansa, Sara Lobo Brites.
Jornalista: Antónia Gusmão
Editora: Julia Chatarina
