DILI, 14 outubru 2020 (TATOLI)–Liuhosi reuniaun Konsellu Ministru (KM) iha kuarta ne’e, ezekutivu sira nomea Alzira Sequeira Freitas dos Reis hanesan Prezidente Konsellu Administrasaun (KA) ba Centro Nacional Chega, Institutu Públiku (CNC,IP, sigla portugés).
“Konsellu Ministru aprova ona projetu deliberasaun, ne’ebé aprezenta hosi Primeiru-Ministru, Taur Matan Ruak, ba dezignasaun membru Konsellu Administrasaun Sentru Nasionál Chega, IP, ba períodu tinan 2020-2023,” Ministru Prezidénsia Konsellu Ministru, Fidelis Manuel Leite Magalhães, informa hafoin ramata reuniaun KM iha Palásiu Governu.
Tuir dekretu-lei ne’ebé kria instituisaun ne’e, KM delibera atu nomea mós Felicidade de Sousa Guterres hanesan membru KA ba mandatu tinan-tolu.
Membru KA seluk maka Arlindo Francisco Marçal, Jovito Rego de Jesus no Sisto dos Santos, nu’udar reprezentante hosi Konfisaun Relijioza sira, eis Komisáriu Komisaun Akollamentu Verdade no Rekonsiliasaun (CAVR, sigla portugés)/Komisaun Verdade no Amizade (CVA,sigla portugés) no Fórum Organizasaun Naun Govermentál Timor-Leste (FONGTIL) sei hetan nomeasaun filafali ba períodu tinan-tolu tan.
Jornalista: Antónia Gusmão
Editora: Julia Chatarina
