DILI, 14 outubru 2020 (TATOLI)—Prezidente Repúblika (PR), Francisco Guterres ‘Lú Olo’, iha 13 outubru, promulga dekretu-lei kona-ba medida sira apoiu hodi hala’o no mantein atividade ekonómika iha ámbitu planu rekuperasaun ekonómika.
Notisia Relevante: Medida rekuperasaun ekonómika sei benefísia povu
Apoiu ne’e sei fó ba entidade empregadora sira-ne’ebé la partense ba setór públiku, ba emprezáriu ne’ebé reprezenta nia-aan rasik, traballadór ho konta rasik no ba traballadór doméstiku ne’ebé lakon sira-nia negósiu ka reseita.
Komunikadu ne’ebé Agéncia TATOLI asesu hosi Palásiu Prezidensiál Nicolau Lobato ne’e hateten, entidade hirak ne’e tenke rejista ona iha rejime kontributivu seguransa sosiál no rejista iha sistema fiskál, hanesan kondisaun atu simu apoiu ne’ebé Governu sei fó mak hanesan dispensa parsiál ba kontribuisaun kada fulan ba seguransa sosiál no fó montante osan kada fulan hanesan subsídiu hodi apoiu hala’o no mantein sira-nia atividade ekonómika.
Apoiu ne’e sei fó mensalmente ba entidade empregadora durante fulan haat hafoin diploma ne’e tama iha vigór. Implementasaun ba medida apoiu ida-ne’e sei lidera hosi Ministru Koordenadór ba Asuntu Ekonómiku ho involvimentu hosi servisu públiku relevante.
Konsellu Ministru aprova Rezolusaun Governu númeru 28/2020, 19 agostu, kona-ba medida kurtu prazu ba mitigasaun impaktu hosi krize ekonómika, hodi nune’e kria apoiu nesesáriu sira ba rekuperasaun ekonómiku, liuhosi estimula empregadór sira hodi hala’o nafatin sira-nia atividade, iha ámbitu Planu Rekuperasaun Ekonómiku.
Prezidénsia Repúblika simu diploma ne’e iha loron 6 fulan outubru 2020, hafoin hetan aprovasaun hosi Konsellu Ministru iha loron 16 fulan setembru tinan 2020.
Jornalista: Cipriano Colo
Editór: Cancio Ximenes
Top of Form
