LAUTÉM, 16 outubru 2020 (TATOLI) – Durante janeiru to’o outubru, tinan ne’e, Polísia Unidade Tránzitu Rodoviáriu Munisípiu Lautém, rejista kazu asidente tráfegu hamutuk 16. Hosi kazu ne’e rezulta vítima na’in-hitu (7) mate no seluk kanek todan ho kamaan.
Notísia Relevante : Fulan tolu, kazu krime 50 akontese iha Lautem

Komandante PNTL Munisípiu Lautém, Superintendente António Rego Fernandes, ba jornalista iha Postu Polísia Lautém, ohin, informa, asidente tráfegu ne’ebé akontese iha Suku Lore II, Postu Administrativu Lospalos, Munisipiu Lautém, domingu (11/10), rezulta ema na’in-tolu mate fatin, na’in-tolu kanek todan no na’in-ualu kanek kamaan.
PNTL halo investigasaun ba karreta trek ho Matríkula A. 51887 baku fila, tanba kauza hosi fatór umanu no problema kondisaun estrada aat halo karreta monu ba rai naruk metru 20-liu.

Vítima sira ne’ebé mate no kanek nu’udar família ida-ne’ebé sai hamutuk iha uma hodi sa’e karreta ba pasa féria hodi selebra sira-nia oan ida ninia aniversáriu iha Tutuala filafali iha tuku 20:00 Otl, maka enfrenta asidente.
Vítima sira ne’ebé kanek, António Rego Fernandes informa, PNTL ho komunidade evakua kedas ba ospitál Lautém hodi hala’o tratamentu intensivu no vítima sira ne’ebé mate entrega ona ba família hodi hala’o funerál iha sira-nia moris fatin.
PNTL mós detein kedas suspeitu motorista ne’ebé lori karreta hodi halo investigasaun no aprezenta ona ba Ministériu Públiku.
Superintendente António simu pose hosi Komandante Jerál PNTL, Komisáriu Faustino da Costa, iha loron 01 jullu 2020, hodi assume knaar nu’udar Komandante PNTL Lautém.
Jornalista: Eugénio Pereira
Editór: Francisco Simões