DILI, 19 outubru 2020 (TATOLI)—Ministériu Edukasaun Juventude no Desportu (MEJD) planeia ona atu kria kondisaun di’ak no investe maka’as ba eskola tékniku vokasionál sira iha territóriu tomak, iha 2021.
Tanba ne’e, Ministru Edukasaun Juventude no Desportu, Armindo Maia, hateten oras ne’e ministériu prepera hela péritu sira atu halo estudu viabilidade ba eskola ensinu sekundáriu tékniku vokasionál sira hodi nune’e bele hatene loloos kondisaun riil ne’ebé maka akontese durante ne’e.
Notísia Relevante:ETV Bekora Sei Sai Eskola Referénsia
“Ami kontaktu ona ho ita-nia parseiru dezenvolvimentu sira atu oferese péritu balun ne’ebé sei halo avaliasaun. Ami espera katak iha 2021 komesa halo avaliasaun hodi halo estudu viabilidade ida, nune’e 2022 ita bele hahú reforsa eskola tékniku vokasionál sira,” Ministru Armindo Maia, hato’o polítika Governu ne’e ba jornalista sira iha eskola tékniku vokasionál indústria teknolojia 28 Novembru Becora, segunda ne’e.
Nia dehan, rezultadu husi estudu viablidade ne’e mak sei sai matéria ida ba ministériu atu aposta iha planu ba oinsá atu aselera prosesu dezenvolvimentu iha eskola tékniku vokasionál sira liliu formasaun ba profesór no fasilidade sira.
Governante ne’e dehan simu ona relatóriu husi eskola ne’e kona-ba sei falta profesór, infraestrutura no laboratóriu, tanba ne’e presija tuur hamutuk hodi haree problema, difikuldade no obstákulu ne’ebé eskola ne’e enfrenta hodi rezolve.
“Prosesu ne’e tenki hein to’o 2022, karik profesór no estudante sira sente katak kle’ur liu, maibé ida ne’e mak reaidade, buat hotu ita atu halo presiza tempu ne’ebé naruk atu bele atinje objetivu sira, prosesu sira ne’e la’ós hanesan kalan ita mehi loron ita realiza,”nia hateten.
Maski nune’e, MEJD liuhosi ninia polítika, tau ona prioridade ba eskola tékniku vokasionál sira atu nune’e bele rezolve problema hotu ne’ebé iha.
“Husi kondisaun ne’ebé ita sei prepara, ita hahú investe daudaun tanba graduadu sira husi eskola tékniku vokasionál sira balun sei kontinua ba universidade no balun sei loke rasik kampu servisu, tanba ne’e mak ministériu tau ona prioridade atu prepara kondisaun diak liu ba futruru,”nia subliña.
Entretantu, totál eskola téknika vokasionál públika hamutuk 58 maka estabelesidu iha territóriu Timor-Leste.
Notísia Relevante:MEJD sei dezenvolve maka’as eskola tékniku vokasionál
Jornalista : Tomé Amado
Editór: Agapito dos Santos
