BUACAU, 19 outubru 2020 (TATOLI)- Komandu FALINTIL-Forsa Defeza Timor-Leste (F-FDTL) hato’o agradese ba programa sétimu ezersísiu “Hari Hamutuk” 2020 ne’ebé halo servisu maka’as tebes hodi ajuda halo konstrusaun ba ekipamentu no dezenvolvimentu infraestrutura F-FDTL nian.
Notísia Relevante : Jenerál Lere dezafia PM Taur, aselera projetu aeroportu Baucau
Ezersísiu “Harii Hamutuk” ne’ebé hahú abertura iha loron 30 setembru no ensera, ohin, iha Komandu Komponente Terrestre Baucau, envolve forsa nasaun tolu hanesan Komandu F-FDTL, Forsa Defeza Austrália no Forsa Defeza Estadu Unidus Amerika (EUA).
Durante fulan ida, forsa hosi nasaun tolu ne’e servisu hamutuk ajuda F-FDTL nia ekipa médiku kompleta ona sira nia formasaun ba primeiru sokorru, resuxitasaun no tau matan ba tratamentu ba kanek nian.
Ekipa mekániku hosi Austrália no F-FDTL hadi’a ona F-FDTL nia karreta balun no baze sirkulasaun bee-moos nian, no hadi’a kazerna militár sira hosi F-FDTL no Austrália nian mós hala’o servisu hamutuk hodi fornese hahán ba partisipante sira.
Servisu seluk tan ne’ebé ekipa hala’o maka hanesan, hadi’a barrajen tanki bee-moos, mini manutensaun tanki mina nian, no manutensaun uma komunikasaun F-FDTL nian iha Baucau, manutensaun no halo instalasaun ba sistema eletrisidade uza loron matan (tenaga surya) iha Postu F-FDTL fronteira Terrestre Cova-Balibo.
Xefe Estadu Maiór Jenerál F-FDTL, Majór Jenerál, Lere Anan Timur dehan, ezersísiu ne’e importante tebes hodi fahe esperiénsia ba malu entre forsa armada sira hodi kapasita forsa F-FDTL iha área enjeñaria, eletrisidade, no seluk tan.
Tuir nia haree, mundu tomak inklui Timor-Leste ohin loron luta maka’as hasoru COVID-19, maibé forsa Amerika no Austrália kontinua fó apoiu ba formasaun ba F-FDTL.
“Ita mai hamutuk hodi forsa kria família ida di’ak, atu koñese malu, konfia malu. Ha’u kada tinan hasoru malu ho jenerál nasaun Indo-Pasífiku no nasaun Europa nian ami ko’alia kona-ba vida povu ninian. Ha’u nia apelu ba nasaun rikeza sira hanesan Amerika, Japaun, Austrália no Xina katak, ami hakarak imi esporta progresu dezenvolvimentu paz ba nasaun kiak sira. Kilat musan no metralladora sira ami lakohi, ami hakarak imi esporta progresu dezenvolvimentu ba ami nia nasaun no povu nia moris di’ak maka importante liu,” Jenerál Lere afirma.
Lere espera, ba futuru formasaun ne’e sei kontinua foka iha formasaun área enjeñaria hodi fahe esperiénsia oin-oin ba forsa F-FDTL atu prepara aan hodi partisipa iha atividade rai-laran no prepara aan hola parte iha misaun dame ONU iha rai-li’ur.
Komandante Jerál F-FDTL ne’e konsidera parte pozitivu ida hosi ezersísiu “Harii Hamutuk” ne’e maka atu lori forsa ninia prezensa besik liután ba povu, hodi povu bele hatudu respeita no domin ba forsa armada ninia prezensa.
Lere espera iha tinan 2021, bainhira nasaun hotu livre hosi ameasa COVID-19, Amerika, Austrália, Japaun, Nova Zelándia no Indonézia mós bele hola parte hodi fahe esperiénsia ba malu.
“Ami mós tenta atu integra mós Indonézia, maibé depende mós ba desizaun polítika, tanba ami nia partisipasaun atu manan esperiénsia hosi forsa nasaun seluk,” nia hateten.
Xefe Estadu Maiór Jenerál F-FDTL, Majór Jenerál, Lere Anan Timur hatutan, obra konstrusaun barak ne’ebé F-FDTL halo hatudu kualidade di’ak, tanba ne’e Governu Timor-Leste liuhosi Ministériu Edukasaun inklui Igreja Katólika Timor-Leste mós hato’o ona pedidu ba F-FDTL atu ajuda halo konstrusaun ba uma eskola no edifísiu sira iha Timor-Leste.
Iha fatin hanesan, Embaixadóra Estadus Unidus Amerika mai Timor-Leste, Kathleen Fitzpatrick hato’o agradese ba Komandu F-FDTL nia vontade hodi simu forsa EUA no Austrália hodi fahe esperiénsia ba membru enjeñaria F-FDTL liuhosi ezersísiu “Harii Hamutuk”.
“Lori Estadus Unidus Amerika nia naran, ha’u orgullu hamutuk ho ita boot sira hodi taka ezersísiu anuál “Harii Hamutuk”, tinan ne’e, ita nia ekipa sira kumpre ona medida prevensaun COVID-19 hodi realiza treinamentu ne’e konklui ona objetu servisu besik 50 hodi implementa projetu konstrusaun lubuk ida,” dehan Embaixadóra Kathleen iha nia diskursu.
Embaixadóra agradese tanba Forsa Amerika no Austrália, Japaun no Nova Zelándia iha kometimentu boot atu ajuda nafatin dezenvolvimentu infraestrutura F-FDTL nian.
Durante implementasaun servisu, Embaixadóra Kathleen mós halo observasaun direita ba projetu konstrusaun sala aula Eskola Ensinu Báziku Vila-Nova halo ho kualidade hodi fasilita estudante sira tuir eskola ho di’ak.
Embaixadóra hatutan, liuhosi programa ezersísiu harii hamutuk ne’e bele hametin liután kooperasaun servisu membru Forsa Amerika ho F-FDTL no Austrália.
“Ita sai forte liután, bainhira ita halo servisu hamutuk hodi integra Timor-Leste nia misaun iha Indo-Pasífiku,” nia apresia.
Nia tatoli tan, programa ezersísiu harii hamutuk mós fó kontribuisaun ba kooperasaun ba demokrasia di’ak iha Forsa Armada Timor-Leste la’o di’ak liután.
Embaixadóra Amerika ne’e espera, ba futuru F-FDTL ninia enjeñaria sira bele partisipa iha misaun Organizasaun Nasoins Unidas (ONU) iha rai-li’ur hodi halo obra ho kualidade.
Reprezentante Embaixadór Austrália ba Timor-Leste nu’udar mós Forsa Defeza Austrália, Tenente Koronél Carl Capper hato’o agradese tebes, tanba “Harii Hamutuk” konsege halo servisu barak no fahe esperiénsia ba forsa F-FDTL sira.
“Projetu konstrusaun boot tinan ida ne’e, F-FDTL ho forsa harii kompañia lojístika foun ne’ebé hetan suporta maka’as hosi membru F-FDTL sira hodi halo projetu ne’e la’o ho susesu,” nia agradese.
Nia dehan, atividade iha ezersísiu ne’e halo servisu barak, no halo servisu makas hodi di’ak no ajuda hadi’a karreta F-FDTL nian, inklui te’in hahán ba ekipa sira ne’ebé halo servisu.
Lori forsa Austrália nia naran, Tenente Koronél Carl Capper hato’o agradese ba Komandu F-FDTL hodi realiza treinamentu ne’e, mezmu Timor-Leste mós luta hasoru propagasaun COVID-19, maibé servisu hotu la’o ho susesu.
Jornalista: Eugénio Pereira
Editór: Francisco Simões
