DILI, 19 outubru 2020 (TATOLI)–Diretór Nasionál Empregu Esteriór hosi Sekretaria Estadu Formasaun Profisionál no Empregu (SEFOPE), Filomeno Soares, rejeita informasaun ne’ebé sirkula dehan prosesu rekrutamentu no teste traballadór timor-oan ba Seasonal Worker Programme (SWP) Austrália mosu irregularidade.
Tuir Filomeno, durante ne’e komisaun organizadora halo tuir de’it prosedimentu ne’ebé Governu rai rua estabelese.
“Sira mai haree iha minutu balun de’it lebele hatene kona-ba prosesu ne’ebé ami estabelese hodi realiza atividade ne’e. Sira labele haree hosi sorin balun de’it, bainhira hakarak halo identifikasaun detallu presiza mai ami-nia fatin no observa durante semana ida atu haree prosesu sira la’o oinsá,” Diretór ne’e hateten ba Agência TATOLI via telefónika, segunda ne’e.
Iha 08 outubru ekipa konjunta ne’ebé kompostu hosi Komisaun Antí-Korrupsaun (CAC, sigla portugés), Comissão Função Pública (CFP) no Provedoria Direitu Umanu no Justisa (PDHJ, sigla portugés) halo inspesaun urjente iha fatin teste fíziku ba kandidatu traballadór iha Sentru Formasaun Polísia, Comoro no kontinua ba Sentru Formasaun SENAI, Becora.
Ekipa ne’ebé partisipa iha inspesaun ne’e informa katak deskonfia mosu irregularidade no la tuir padraun SEFOPE ne’ebé estabelese ona no mosu konflitu interese.
Notísia Relevante: Rekrutamentu traballadór SWP Australia la tuir padraun no mekanizmu
Ba kestaun ne’e, Diretór Empregu Esteriór husu entidade ne’ebé halo inspesaun atu analiza buat ne’ebé identifika molok divulga ba públiku.
“Haree sorin balun de’it, dehan ami halo buat hotu iha tinan barak nia laran a’at hotu de’it, institusaun ida hambrik ho serbisu hotu la’ós fásil. Tanba ne’e bainhira ita fó sai buat ruma ne’ebé dehan mal administrasaun ka mal prátika, presiza mai haree no estuda lai buat ne’e loos hotu ou lae,” nia subliña.
Nia garante, asesór no ema ne’ebé ho kargu polítiku la envolve direita iha prosesu rekrutamentu maibé envolve de’it maka funsionáriu SEFOPE inklui instituisaun sira hanesan CAC, CFP, PDHJ no Inspesaun Jerál Estadu Auditoria Interna atu haree prosesu ninia transparánsia.
Prosesu rekrutamentu kandidatu SWF naruk no bazeia ba manuál rekrutamentu ne’ebé estabelese ona hosi Governu Timor-Leste no Austrália liuhosi akordu hanesan sit up, push up, halai no kritéria seluk tan.
“Se maka liu tau kaixa ida hodi hatama dadus, hafoin lori hatama ba sistema maka foin fó sai rezultadu, ne’ebé la’ós buat fásil ida,” nia fó hanoin.
Diretór ne’e konsidera, rezultadu inspesaun ne’ebé institusaun tolu halo laiha baze forte tanba laiha formuláriu atu priénxe maibé verbál de’it.
“Laiha evidénsia hosi ekipa konjunta atu indentifika loloos katak atividade ne’ebé ami halo komete sala no sira mós labele buka ami-nia sala de’it, tanba durante ne’e sira laiha evidénsia atu avalia ami,” nia hatutan.
Dirijente ne’e argumenta, formuláriu avaliasaun maka bele identifika sala atubele hadi’a iha futuru.
“Labele sira mai ko’alia de’it maka justifika sala tanba durante ne’e laiha, ezemplu institusaun ida haruka ha’u ba halo inspesaun, tenke iha formuláriu avaliasaun maibé ida agora sira laiha no nunka entrega buat ruma mai hanesan formuláriu avaliasaun atubele hadi’a prosesu sira,” nia subliña.
Jornalista: Natalino Costa
Editora: Julia Chatarina
