DILI, 23 outubru 2020 (TATOLI)-Ministériu Edukasaun Juventude no Desportu (MEJD) hahú iha tinan 2016 to’o 2017 ne’e transforma ona eskola sekundáriu jerál hamutuk sanulu ba eskola tékniku vokasionál ka TECVOC iha Timor-Leste.
Diretór Jerál Ensinu Sekundária MEJD, Deolindo da Cruz, informa daudaun ne’e Timor-Leste iha ona eskola tékniku vokasionál hamutuk 58, kompostu husi públiku 43 no privadu 15.
Notísia Relevante:2021, MEJD sei investe ba eskola tékniku vokasionál sira
Eskola Ensinu Sekundáriu Jerál (ESJ) 10 ne’ebé transformadu ba TECVOC hanesan ESJ Hatudu Ainaro tranforma ona ho Departamentu Komérsiu Kontabilidade no Produsaun, ESJ númeru 3 Bobonaro ho Departamentu Produsaun Agrária, ESJ Malibaca Maliana ho Departamentu Komérsiu, Kontabilidade, Otelária no Turizmu, ESJ Zumalai ho Departamentu Komérsiu, Kontabilidade no Jestaun Informátika.
Aleinde ne’e, ESJ Fohorem Covalima ho Departamentu Produsaun Agrária, ESJ 28 Novembro Becora Dili ho Departamentu Artegráfika, Eletrisidade, audivizuál no Televizaun, Elektrónika no Informátika.
ESJ Leorema Munisípiu Liquiça transforma ba TECVOC ho Departamentu Produsaun Agrária, ESJ, Soibada Munisípiu Manatutu ho Departamentu Otelária no Turizmu. ESJ Halibur Betano Munisípiu Manufahi ho Departamentu Komérsiu no Produsaun Agrária, no ESJ Francisco Borja da Costa Manufahi ho Departamentu Otelária no Turizmu.
Iha 2021, MEJD planea ona sei dezenvolve maka’as eskola tékniku vokasionál sira intermuz rekursu umanu no ekipamentu. Iha aspetu rekursu umanu, Governu liuhosi MEJD hakarak rekruta tan profesór purvolta 75 iha faze dahuluk nian iha área espesífiku hodi destaka tan ba eskola TECVOC sanulu ne’e.
Tanba daudaun ne’e foin iha profesór rihun 1-resin, kompostu husi permanente 600-resin, kontratadu 300-resin no parsiál 200-resin maka destaka iha eskola tékniku vokasionál 58 iha territóriu Timor-Leste hodi hanorin estudante sira.
Totál estudante TECVOC husi desimu anu to’o desimu segundu anu hamutuk 16.675. desimu anu 5.460, desimu primeiru anu 5.761 no desimu segundu anu 5.464.
Notísia Relevante:Eskola Tékniku Vokasionál Becora enfrenta menus profesór ho fasilidades
Jornalista : Tomé Amado
Editór :Agapito dos Santos
