DILI, 22 outubro 2020 (TATOLI)—Institutu Superiór Filozofia no Teolojia (ISFIT) Don Jaime Garcia Goulart Fatumeta sei hala’o graduasaun dahuluk ba ninia estudante finalista hosi fakuldade filozofia no teolojia hamutuk na’in 100, iha loron 13 fulan-novembru tinan ne’e.
Reitór ISFIT Padre Domingos Alves da Costa, hateten dezde ezisténsia iha 2013 liubá rejista estudante hamutuk ema na’in 350, ikus mai 100 mak konsege ramata sira-nia estudu hodi hetan graduasaun iha fulan-oin kompostu husi fakuldade filozofia na’in 66 no teolozia na’in 34.
Notísia Relevante :ISFIT Adia Programa Graduasaun Tanba Covid-19
“Preparasaun ba graduasaun ami konklui ona no haruka ona pedidu ba Ministériu Ensinu Superiór atu hetan tan de’it despaixu ba graduasaun nian, nune’e ami bele hetan rekoñesimentu formál husi Governu,” Padre Domingos hateten ba jornalista TATOLI iha ninia serbisu fatin ISFIT Fatumeta, ohin.
Kona-ba programa ba serimónia graduasaun nian, reitór ne’e hateten, sei hahú ho yudisium iha loron 11 fulan-novembru no sei partisipa hosi Bispu Dioseze Baucau, Don Basílio do Nascimento ho nia tema diskursu sapiénsia maka, ‘fé no kultura’.
“Molok serimónia graduasaun, loron ida antes sei loke ho selebrasaun Eukarístika ne’ebé sei prezide hosi Prezidente Konferénsia Episkopál Timorense Bispu Dioseze Maliana Don Norberto do Amaral”, Padre Domingos haktuir.
Padre Domingos mós konta oitoan kona-ba istória ezisténsia institutu ne’e katak, ISFIT hari’i hosi Bispu Don Carlos Filipe Ximenes Belo, SDB no Don Basílio do Nascimento hodi fó de’it oportunidade ba kandidatu foun sira atu prepara-an sai amu lulik, maibé bainhira institutu ne’e loke ba públiku konsege iha ona leigu feto no mane barak mak hola parte hodi aprende iha ISFIT.
“Insitutu ida ne’e ninia na’in mak bispu sira ne’ebé hamahan-an iha Konferénsia Episkopál Timorense. Tanba ne’e, sira hanaran Institutu Superiór filozofia no teolozia Don Jaime Garcia Goulart, hodi fó konsiderasaun nu’udár bispu dahuluk iha Timor Português iha tinan 1945,” nia esplika.
Entretantu, ISFIT nia ezisténsia hetan ona avaliasaun hosi Ajência Nacionál Avaliasaun Akreditasaun Akadémika (ANAAA) ho valór pursentu 91, kategoria ‘muito bom’ ba ninia prosesu ensinu aprendizajen sira.
Notísia Relevante :Reitór ISFIT Rekomenda Ba Estadu Atu Harii Majistériu
Jornalista: Tomé Amado
Editór: Agapito dos Santos
