DILI, 23 outubru 2020 (TATOLI)—Institutu Politékniku Betano (IPB) iha fulan-novembru 2020 sei fó graduasaun dahuluk ba estudante finalista hamutuk na’in 158 husi Eskola Superiór Produsaun Animal no Konstrusaun Sivíl.
Estudante finalista husi Eskola Superiór Produsaun Animal 104, mane iha ema na’in 58 no feto 46, Konstrusaun Sivíl iha finalista 54 kompostu husi mane 34 no feto 20.
Notísia Relevante:IPB-UNTL Asina Nota Entendimentu no Akordu Kooperasaun
Prezidente IPB Acácio Cardoso, informa antes ne’e submete ona pedidu graduasaun ne’e ba Gabitene Jurídiku Ministériu Ensinu Superiór Siénsia no Kultura (MESSK) hodi hetan aprovasaun.
“Ami termina ona fulan-novembru tenki selebra graduasaun ba estudante finalista IPB nian maibé data fiksu mak ami seidauk deside tanba presiza hein aprovasaun husi Ministru Ensinu Superiór Siénsia no Kultura (Longuinhos dos Santos) depois lista graduadu sira nian públika ona iha Jornal Repúblika mak ami foin deside data fiksu,” nia hateten ba jornalista sira iha Kampus UNTL Dili, sesta ne’e.
Atu konfirma loloos data graduasaun ne’e maka iha kinta (22/10) nia parte konfirma ona asuntu ne’e ho Diresaun Gabinete Jurídiku MESSK nian, maibé sira responde katak enkamina ona ba Gabinete Ministru nian hodi hetan aprovasaun.
Kona-ba preparasaun, nia dehan daudaun ne’e hala’o hela prosesu verifikasaun dokumentu no transkrisaun valór estudante finalista sira-nian.
Entretantu, tuir dadus to’o 2019 Departamentu Produsaun Animál (PA) iha estudante na’in 247 iha tinan 2017 na’in 116, tinan 2018 na’in 49, tinan 2019 na’in 82. Enkuantu, estudante hosi Konstrusaun Sivíl iha na’in 167, tinan 2017 iha na’in 59, tinan 2018 na’in 38 no tinan 2019 iha na’in 70.
Nune’e mós iha staff administrasaun na’in-17 no dosente na’in-25, estrutura 3, Produsaun Animál iha na’in-ualu (8), destakadu na’in-tolu (3) no materiál jerál na’in-haat (4).
Sistema aprendijazen iha IPB, nia haktuir, aplika ano zero ba semestre 1 no 2, tinan akadémiku semestre 3 to’o 6. Karik estudante sira-nia IPK-Index Prestasi Kuliah ka Índise Dezempeñu Akadémiku la to’o 2.0, sira labele kontinua ba tinan akadémiku alias “DO-Drop Out’.
Kursu ne’ebé hala’o iha IPB bazeia ba estatutu mak hanesan Eskola Superiór Agronomia no Zootéknia (ESAZ) no Eskola Superiór Enjeñaria (ESE).
Iha Eskola Superiór Agronomia no Zootéknia (ESAZ) iha kursu Produsaun Animál no kursu sira seluk sei estabelese iha futuru hanesan saúde animál, prosesamentu alimentár, floresta no agronomia.
Iha Eskola Superiór Enjeñaria (ESE) nia okos kursu Konstrusaun Sivíl ne’ebé la’o ona no kursu seluk ne’ebé sei loke iha futuru mak hanesan IT (Informasaun Teknolojia), Mekánika no Eletrónika.
Notísia Relevante:IPB no CNEFP Tibar Asina Nota Entendimentu ho Akordu Parseria
Jornalista : Tomé Amado
Editór :Agapito dos Santos
