DILI, 23 outubru 2020 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, deklara to’o oras ne’e seidauk simu pedidu graduasaun ba estudante finalista husi Institutu Politékniku Betano ne’ebé maka tuir planu sei hala’o iha fulan-novembru.
“Ha’u seidauk simu proposta husi sira se karik sira husi IPB mak hato’o proposta mai Ministériu ha’u rasik sei hatun despaixu ba ekipa tekníku atu halo verifikasaun ba dadus sira ne’e perante fulan ida nia laran,” Governante ne’e dehan asuntu ne’e iha ninia servisu fatin Colmera Dili.
Notísia Relevante :IPB sei fó graduasaun dahuluk ba estudante finalista 158
Maibé Governante ne’e hateten sei aprova pedidu ne’e bainhira simu ona husi IPB.
“Maibé problema mak to’o agora hau seidauk simu proposta IPB nian, agora karik iha ona Gabineti Jurídiku MESSK nian entaun sira sei verifika depois mak haruka mai ha’u,” nia dehan.
Entretantu, Institutu Politékniku Betano (IPB) iha fulan-novembru 2020 sei fó graduasaun dahuluk ba estudante finalista hamutuk na’in 158 husi Eskola Superiór Produsaun Animal no Konstrusaun Sivíl.
Estudante finalista husi Eskola Superiór Produsaun Animal 104, mane iha ema na’in 58 no feto 46, Konstrusaun Sivíl iha finalista 54 kompostu husi mane 34 no feto 20.
Notísia Relevante :IOB-UNPAZ seidauk simu kalendáriu graduasaun husi Governu
Jornalista : Tomé Amado
Editór :Agapito dos Santos
