DILI, 26 outubru 2020 (TATOLI)—Timor Gás no Petróleu, Empreza Públika (Timor GAP,E.P) daudaun ne’e prepara hela kondisaun atu fornese mina ba Eletricidade de Timor-Leste, Empreza Públika (EDTL,E.P) hodi reforsa sentrál elétrika.
Diretór Jerál Negósiu Downstream Timor GAP, Francelino Boavida, hateten ba kestaun ne’e empreza públika preparadu partisipa fornese kombustível no prepara hela fasilidade atubele halo instalasaun tanba presiza hahú prosesu aprovizionamentu atu kontrata kompañia ne’ebé halo instalasaun no dezeñu ba fasilidade.
“Tuir planu ami sei fornese iha fulan-janeiru, entaun ami presiza hatene uluk fasilidade ne’ebé maka iha ona atubele utiliza ou posibilidade atu aluga, iha mós opsaun seluk atu halo instalasaun ba ami-nia fasilidade mesak,” Diretór Jerál ne’e informa ba Agência TATOLI, iha Timor Plaza, foin lalais ne’e.
Iha loron 30 setembru, Konsellu Ministru aprova alterasaun projetu dekretu-lei kona-ba partisipasaun Timor GAP fornese kombustível EDTL, nune’e permite fornesimentu nesesáriu no seguru hodi bele mantein funsionamentu sentru produsaun eletrisidade.
Notísia Relevante: Reuniaun KM: deside Timor GAP fornese kombustível ba EDTL
Tuir Diretór Jerál ne’e, iha enkontru ezekutivu konsege halo korresaun iha parte balun, tanba ne’e ministériu ne’ebé envolve hanesan Ministériu Petróleu Minerál (MPM), Ministériu Obra Públika (MOP) inklui Ministériu Planu no Ordenamentu (MPO) sei finaliza kontiúdu balun no semana ne’e sei manda ba Prezidente Repúblika hodi hetan promulgasaun.
Aleinde ne’e, ministériu relevante sei asegura kontratu no parte Timor GAP komunika ona ho empreza parseiru sira hodi envolve iha prosesu.
“Liuliu empreza ne’ebé atu fa’an mina ba ami iha prosesu ne’e rasik. Ami-nia parseiru balun hosi Singapura, Malázia, Taiwan, no seluk tan, maibé seidauk bele avansa ba oin tanba presiza hatene uluk kuantidade ne’ebé atu fornese no ninia lokál, kuandu deside maka Timor GAP foin avansa ho kontratu ho parseiru,” nia akresenta.
Nia dehan, ekipa empreza públika ne’e identifika ona lote iha Hera no Betano hodi haree mós ba falisilidade ezistente, ne’ebé empreza fornese hela kombustível iha sentál elétrika hanesan SACOM no ETO+ iha ona hodi bele ajusta.
Daudaun Timor GAP identifika ona kompañia hitu hodi haree ein termu kapasidade finanseira no téknika atubele suporta.
“Ita hatene durante COVID-19 kompañia barak maka hetan impaktu negativu inklui balun mós bankrota, entaun ami presiza haree asuntu ida-ne’e inklui haree sira-nia kapasidade fornesimentu durante ne’e. Ami seidauk bele deside atu la’o ho kompañia ida ne’ebé, maibé molok foti desizaun MOP sei define kuantidade kombustível hira maka presiza fornese,” nia akresenta.
Iha dekretu-lei ne’e rasik la mensiona kuantidade kombustível no lokál fornesimentu.
“Ita iha planta EDTL rua Hera no Betano, tanba ne’e ami hakarak iha kuantidade ne’ebé boot no ami prefere Hera tanba ninian fasilidade di’ak liu kompara ho Betano,” Francelino esklarese.
Maski nune’e, nia admite desizaun define kuantidade atu fornese la’ós kompeténsia Timor GAP maibé parte MOP.
“Ita presiza pasiénsia oituan, hau hanoin iha tempu badak kuandu Prezidente Repúblika promulga ona dekretu lei ne’e maka ami sei tama ba faze kontratu. Iha faze ne’e maka ita sei hatene loloos atu fornese ba lote ida ou rua,” nia fó hanoin.
Jornalista: Natalino Costa
Editora: Julia Chatarina
