DILI, 27 outubru 2020 (TATOLI)–Sekretáriu Estadu Kooperativa (SEKoop), Elizário Ferreira, lansa relatóriu serbisu durante loron-100 liuhosi publikasaun iha buletin ho tema ‘serví ho honestidade, humildade no simplisidade’.
Iha relatóriu serbisu, SEKoop fó sai katak durante ne’e identifika kooperativa hamutuk 30 mak taka atividade.
“Ami identifika kooperativa balun taka, ne’ebé la’ós ha’u mak taka maibé na’in taka tanba sira rasik la dezenvolve no sira ne’ebé seidauk taka SEKoop tenta hadi’a liuhosi formasaun no reativa filafali atividade, nune’e bele tuir valór no prinsípiu kooperativa nian,” Sekretáriu Estadu ne’e informa hafoin lansamentu relatóriu serbisu, iha salaun enkontru SEKoop, Akait, tersa ne’e.
Kooperativa ne’ebé taka, maioria hanesan kooperativa produsaun no la’ós taka totalmente maibé sei fó tempu atu hadi’a no bele reativa hikas.
Problema ne’ebé Sekretaria Estadu identifika bainhira koooerativa deside atu taka maka kontabilidade no rekursu umanu la sufisiente no ladún iha kapasidade jere organizasaun.
Governante ne’e konsidera, lansamentu buletin nu’udar meiu hodi hato’o informasaun ba sosiedade hodi akompaña serbisu instituisaun.
“Lansamentu kona-ba ha’u-nia serbisu loron-100 hanesan meiu ida atu fó informasaun ba sosiedade tomak atu akompaña serbisu no bele mós halo avaliasaun ba ha’u-nia dezempeñu rasik, nune’e serbisu ba oin bele di’ak liután tuir povu-nia hakarak no serví duni povu, tanba ha’u mai la’ós atu ema serví ha’u maibé mai atu serbisu,” nia subliña.
Governante ne’e iha esperansa, relatóriu ne’e bele kontribui informasaun balun ba populasaun.
“Ha’u hahú serbisu iha loron 29 juñu no ha’u deklara katak prioridade loron-100 sei estabelese kooperativa lima maibé agora estabelese ona 15, no sei hala’o formasaun ba kooperativa lima no formasaun la’o ona ba kooperativa 18, ne’ebé ema besik 1.000-resin maka hola parte iha formasaun inklui formasaun ba formadór sira,” nia akresenta.
Durante loron-100, membru ezekutivu ne’e hala’o vizita ba munisípiu no postu administrativu sira atu hatene kondisaun kooperativa sira inklui fasilita semináriu iha nível postu administrativu atubele asegura sustentabilidade kooperativa no fó kbiit atu grupu kooperativa sira bele hala’o atividade tuir prinsípiu kooperativa.
Enkuantu SEKoop rejista ona kooperativa produsaun hamutuk 60 no kooperativa kréditu 137 mak ativu, ne’ebé fahe ba kategoria A, B no C.
Kategoria A ba sira ne’ebé iha kapitál liu ona $500.000, iha sede rasik no iha funsionáriu mínimu na’in-lima, kategoria B ho kapitál menus hosi $500.000 to’o $250.000, no kategoria C mak sira ne’ebé kapitál menus hosi $250.000 no ida ne’ebé tama iha kandidatu membru maka sira ne’ebé seidauk iha sede maibé bele akomoda ema na’in-15 no sira-nia kapitál iha $3.000.
Kooperativa kategoria A, SEKoop sei la fasilita formasaun ba sira maibé hosi federasaun maka fasilita no ba kooperativa kategoria B sei hetan akompañamentu hosi federasaun no Sekretaria Estadu ne’e rasik.
Enkuantu, kategoria C no membru kandidatu ne’e hetan akompañamentu totál hosi SEKoop inklui federasaun sira atubele haburas, hametin, haboot no habelar, atu nune’e sai instituisaun ida forte hodi kontribui ba dezenvolvimetu ekonomia país.
Jornalista: Antónia Gusmão
Editora: Julia Chatarina
