DILI, 27 outubru 2020 (TATOLI)—Ministru Edukasaun Juventude no Desportu (MEJD), Armindo Maia, hateten ba futuru sei instala liña internet gratuita ba eskola sira iha área rurál hodi fasilita estudante sira para asesu inovasaun teknolojia no mós aprende siénsia sira.
“Ita sei fó mós oportunidade ba estudante sira la’ós iha sidade de’it maibé ba mós estudante sira iha área rurál tanba ita iha potensia bo’ot kona ba teknolojia komunikasaun no informasaun hodi nune’e bele lori edukasaun ida di’ak ba ita-nia oan sira hotu,” dehan Governante durante konferénsia informasaun no teknolojia komunikasaun (ICT-sigla inglés).
Notísia Relevante :Edukasaun mak dahuluk no edukasaun ba ema hotu
Governu rekoñese katak durante ne’e estudante barak iha área rurál seidauk asesu liña internet ho di’ak bainhira hakarak aprende siénsia ruma ne’ebé ligadu ho sira nia estudu.
“Polítika Ministériu Edukasaun nian ho apoiu parseiru dezenvolvimentu sira oinsá bele lori edukasaun ba ema hotu iha Timor-Leste, tanba fasilidade ne’ebé di’ak hodi garante edukasaun ida di’ak ba labarik sira ho másimu,” nia hateten.
Atu aselera prosesu dezenvolvimentu setór edukasaun iha Timor-Leste, Armindo Maia, hateten presiza hetan apoiu mós husi inan-aman no entidades hotu iha nasaun ne’e.
Instalasaun liña internet importante tanba haree husi esperénsia durante pandemia globál COVID-19, estudante barak maka la asesu eskola online tanba problema internet.
Notísia Relevante :Aumenta aprendizajen dijitál iha Timor-Leste
Jornalista : Tomé Amado
Editór:Agapito dos Santos
