DILI, 27 outubru 2020 (TATOLI)—Primeiru Ministru (PM), Taur Matan Ruak, agradese Deputadu sira bele fó votu unanimidade favorável 42, hodi autoriza Prezidente Repúblika dekreta Estadu Emerjénsia (EE) dahitu ba loron-30.
“Governu agradese Parlamentu Nasionál, liuliu bankada hotu ne’ebé kontinua apoia ho solidaridade ba Governu no nasaun tomak hodi luta hasoru surtu COVID-19,” PM Taur tenik iha apresiasaun pedidu autorizasaun renova deklarasaun EE dahitu, iha sala plenáriu Palamentu Nasionál (PN), tersa ne’e.
Xefe Governu nota katak surtu COVID-19 kontinua sai inimigu boot ba ema hotu, tanba ne’e Governu determinadu atu prevene no kombate maski ho difikuldade tanba lakohi husik atu perturba sosiedade nia moris no hamate ema.
“Ita hotu sai ema ida de’it hodi bale proteje ita-nia rai ne’e, la’ós ba dahuluk mak ita halo maibé hahú kedan hosi ita-nia nasaun sofre risku COVID-19,” PM afirma.
Notísia Relevante: PN aprova estensaun Estadu Emerjénsia dahitu
Pedidu hosi Prezidente Repúblika, Francisco Guterres ‘Lú Olo’ ba renovasaun deklarasaun EE iha territóriu nasionál tomak, hahú hosi tuku 00:00 loron 04 novembru 2020 (kuarta) no termina iha tuku 23:59 loron 03 dezembru 2020 (kinta), ho parsialmente hodi suspende diretu balun tuir mai ne’e:
Dahuluk, sirkulasaun internasionál sei estabelese kontrolu sanitáriu iha portu, aeroportu no postu fronteira terrestre, atu impede moras tama mai territóriu nasionál ka kondisiona observánsia kondisaun nesesáriu hodi evita risku propagasaun epidemia ne’e, nune’e mós toma medida nesesária asegura sirkulasaun internasionál ba sasán no servisu esensiál sira.
Daruak, liberdade sirkulasaun, fixasaun rezidénsia ba kualkér pontu iha territóriu nasionál ne’ebé sei lidera hosi autoridade públika sira hodi bele redús risku kontájiu no ezekuta medida prevensaun no kombate epidemia, inklui konfinamentu kompulsivu domisiliáriu no impozisaun saniáriu sira.
Ikus liu, direitu rezisténsia ba kualkér aktu ativa ka pasiva hosi autoridade públika kona-ba ezekusaun EE.
Jornalista: Florêncio Miranda Ximenes
Editora: Julia Chatarina
