GLENO, 30 outubru 2020 (TATOLI)-Hosi fulan janeiru to’o outubru, tinan ne’e, Servisu Estabelesimentu Prizionál Gleno, Munisípiu Ermera, re-íntegra dadur na’in-40 resin ba sosiedade hodi hamutuk ho ida-idak nia família.
Diretór interinu Prizaun Gleno, Cristiano Salsinha, ba Agência Tatoli, ohin, iha Gleno, hateten dadur sira ne’e kumpre ona sira nia devér maioria kondenadu no hetan liberdade kondisionál hosi desizaun Tribunál nian no balun hetan indultu.
Cristiano Salsinha dehan, prizaun hanesan fatin ida atu halo reflesaun no muda ema nia mentalidade hosi hahalok sira pasadu ba futuru.
Oinsá bele muda, tanba ne’e dadur sira durante iha prizaun laran iha atividade lubuk ba sira hala’o hanesan tuir formasaun karpintária, pedreira, soldura, halo artezenatu sira, kustura, kursu lian portugés no vokasionál.
“Atividade iha formasaun daudaun ne’e mós kontinua la’o loron-loron,” Cristiano Salsinha hateten.
Nia dehan, iha mós formasaun espirituál no tuir planu sei loke mós formasaun ba komputadór.
Atividade formasaun sira-ne’e iha parseiru balun mak apoiu materiál no Guarda Prizionál sira mak fó formasaun ba dadur sira.
Cristiano Salsinha hatutan, ho atividade sira-ne’e hotu bainhira re-íntegra ba sosiedade sei forma ema ho hanoin ida katak hahalok iha pasadu hanesan ladi’ak nune’e oinsá kontribui di’ak ba dezenvolvimentu iha nasaun.
Daudaun ne’e, Prizaun Gleno iha dadur na’in-117 kompostu hosi prizaun preventiva na’in-rua no kondenadu-114 hosi ne’e iha sidadaun Indonézia na’in-rua.
Dadur sira ne’e maioria hetan kondenadu ho kazu ne’ebé ho númeru boot hanesan omisídiu, violasaun seksuál, brankamentu kapitais no insestu.
Jornalista: Nelson de Sousa
Editór: Francisco Simões
