DILI, 03 novembru 2020 (TATOLI)—Sekretaria Estadu ba Igualdade no Inkluzaun (SEII) daudaun ne’e prepara hela programa atu hasa’e partisipasaun feto no portadór difisiénsia iha vida polítika no nível foti desizaun.
“Ita nafatin halo esforsu oin-oin no hein katak iha eleisaun tuir mai, hanesan eleisaun suku no prosesu desentralisaun ne’ebé atu akontese inklui prosesu eleisaun parlamentár, ita bele haree persentajen feto barak liután iha Parlamentu, Governu no funsionamentu públiku, Sekretária Estadu ba Igualdade no Inkluzaun, Maria José da Fonseca Monteiro de Jesus, dehan ba Agência TATOLI foin lalais ne’e iha Hera.
Maski nune’e, nia nota katak daudaun persentajen feto iha Parlamentu Nasionál (PN) hahú sa’e to’o 38% ne’ebé ekivalente ho deputada hamutuk na’in-25 hosi totál 65 reprezentante povu, kompara ho tinan antes ne’e.
Enkuantu iha Governu sei mínimu partisipasaun feto hanesan membru Governu hamutuk na’in-hitu hosi totál 43.
“Ita haree iha Parlamentu kuaze 40% ona no iha Governu sei kiik, iha funsionamentu públiku no kargu xefia sira iha persentajen balun. Entaun ita hakarak atu kontinua promove no asegura katak feto nafatin tenke hetan oportunidade hanesan iha kargu no foti desizaun iha kargu públiku sira,” nia akresenta.
Aleinde ne’e, governante ne’e hatutan, envolvimentu feto agora iha setór privadu iha 30%.
“Ita nafatin serbisu hamutuk ho setór privadu no setór públiku, nune’e ita hakarak parte hotu bele envolve feto, buat sira ne’e labele SEII mesak maka halo serbisu maibé presiza parte hotu ninia partisipasaun,” nia fó hanoin.
Sekretária Estadu konsidera buat ne’ebé SEII atinje ona, hahú hosi serbisu boot ne’ebé halo ona iha tempu naruk nia laran.
“Ne’e la’ós buat ida to’o mai VIII Governu foin halo, maibé baze ne’e hahú kedan iha inísiu hosi partisipasaun feto ih tempu rezisténsia to’o agora,” nia hatutan.
Partisipasaun feto hahú hosi Maria Tapó ne’ebé mate ho kilat iha batalla ho inimigu.
“Feto kontinua envolve iha prosesu tomak luta ba ukun rasik-an, ita fiar katak feto iha kapasidade, koñesimentu, matenek no esperiénsia. Tanba ne’e maka feto no mane, maluk portadór difisiénsia, komunidade LGBT bele kontribui nafatin no oportunidade tenke fó hanesan sein deskriminasaun ba sé de’it,” nia subliña.
Jornalista: Natalino Costa
Editora: Julia Chatarina
