DILI, 04 outubru 2020 (TATOLI)—Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa, deklara nia parte seidauk hato’o promesa ba reprezentante Klibur Instituisaun Superiór Privadu Timor-Leste (KIESP-TL) hodi aprova sira-nia proposta ho montante orsamentu ho valór $ 5.8.
“Komisaun G nunka halo promesa ida ba iha ne’eba tanba komisaun G labele ultrapasa buat ne’ebé mak ezekutivu sira halo,”nia afirma ba Tatoli via telefone, kuarta ne’e.
Notísia Relevante :KIESP-TL Hato’o Proposta Millaun $5.8 ba Parlamentu Nasionál
Komisaun G aprezenta ona proposta ne’e iha plenaria foinlalais ne’e no haruka ona ba Governu liuhosi Ministériu Ensinu Superiór Siénsia no Kultura (MESSK). “Maibé hanesan deputadu ami sei hakilar nafatin iha Parlamentu Nasionál,” nia promete.
Entretantu antes ne’e, universidade privada 10 ne’ebé hamahan an iha KIESP-TL hatama ona sira-nia proposta hamutuk 10 ba Komisaun G PN nian maka fó bolsu estudu ba dosente, bolsu estudu ba estudante, subsídiu orsamentu ba saláriu dosente, fasilidade laboratóriu, internet, komputadór, impréstimu no seluk tan ho montante orsamentu $5.8.
Universidade privada 10 ne’e kompostu husi IOB, DIT, UNDIL, UNPAZ, ISC no seluk tan.
Notísia Relevante :Komisaun G Sei Aprezenta Proposta KIESP-TL Ba Plenária
Jornalista : Tomé Amado
Editór :Agapito dos Santos
