COVALIMA, 07 novembru 2020 (TATOLI) – Bee-moos hanesan nesesidade báziku ba ema nia moris loroloron nian, maibé realidade iha territóriu Timor-Leste, liuliu iha area remotas sira, komunidade kontinua enfrenta bee-moos.
Iha Suku Tashilin, Postu Administrativu Zumalai, Munisípiu Covalima, dezde tempu ukun-an to’o mai ohin loron, tenke la’o ain ho distánsia kilómetru tolu-resin mak bele hetan bee-moos.
Notísia Relevante : Governante na’in-neen distribui Cesta Bázika iha Suku Tasilin
Xefe Suku Tashilin, Martino Magno hateten, dezde Timor-Leste restaura nia independénsia iha 20 maiu 2002, to’o mai ohin loron, ninia komunidade seidauk bele asesu ba bee-moos iha sira ida-idak nia horik fatin, maibé tenke la’o ain kilómetru tolu-resin mak foin hetan bee-moos.
“Ha’u nia komunidade sira iha suku ne’e hosi uluk kedas to’o agora halerik mak bee-moos, buat seluk laiha. Maibé tuir Planu Dezenvolvimentu Suku (PNDS) nia haree ona atu halo perfurasaun mais seidauk iha solusaun,” Xefe Suku Martino Magno informa ba Agência Tatoli, sábadu ne’e iha Tasilin.
Nia dehan, autoridade lokál esforsu hela hodi buka alternativu atu dada bee-moos hosi fatin seluk, maibé esforsu hirak ne’e sei sai hanesan esforsu de’it, tanba ne’e komunidade tenke buka bee-moos ho distánsia dook.
Kona-ba estrada no eletrisidade, Xefe Suku hateten, maioria (100%) komunidade Tashilin asesu hotu ona.
“Kona-ba ahi ho estrada agora komunidade sira asesu hotu ona. Estrada di’ak ona para komunidade sira bele lori sira-nia produtu hanesan ikan no modo ba fa’an iha merkadu,” nia hateten.
Jornalista: Hortencio Sanchez
Editór: Francisco Simões
