DILI, 10 novembru 2020 (TATOLI)—Prezidente Konsellu Nasionál Juventude Timor-Leste (CNJTL-sigla portugés), Maria Dadi Soares Magno, hateten CNJTL la konkorda prespetiva públiku nian katak joven mak autór ba krime.
Kazu krime ne’ebé durante ne’e komete husi joven na’in ida la reprezenta joven feto ho mane sira iha Territóriu Timor-Leste.
Notísia Relevante :CNJTL Enkoraja Joven Sira Tenke Orgullu Nu’udar Timoroan
“Ita tenke esforsu atu muda hanoin ida ne’e, tanba joven ida labele reprezenta joven hotu iha nasaun ne’e,” nia hateten ba jornalista sira hafoin sai oradór ba semináriu nasionál ho tema jerál “Joven Autór ba Harii Sosiedade Reziliente” hodi komemora tinan 29 masakre Santa Cruz Dili no loron nasionál juventude ba dala 15 ne’ebé hala’o iha salaun Delta Nova, ohin.
Nia observa katak joven barak iha talentu iha área oioin maibé laiha oportunidade hodi dezenvolve sira-nia talentu hirak ne’e.
Tanba ne’e, CNJTL rekomenda ba Governu liliu Ministériu Edukasaun, Ministériu Saúde, Minist’eriu Turizmu no Kultura, Organizasaun Naun Govermentál, Ajénsia Internasionál no ema hotu-hotu atu kria kondisaun ba joven sira hodi dezenvolve sira-nia talentu.
“Ita hein planu no programa VIII Governu nian oinsá bele iha konsistensia servisu ho liña minsisteriál sira ne’ebé mak servisu kona-ba asuntu juventude atu bele fó atensaun ba juventude sira,” nia hateten.
Notísia Relevante :Joven purvolta rihun 48 laiha oportunidade bá eskola
Jornalista :Tomé Amado
Editór:Agapito dos Santos
