DILI, 10 novembro 2020 (TATOLI)—Prezidente Konsellu Nasionál Juventude Timor-Leste (CNJTL-sigla portugés), Maria Dadi Soares Magno, hateten tuir relatóriu sensu uma-kain 2010 ne’ebé públika husi not in employment, education, or training (NEET) katak purvolta joven rihun 48 iha territóriu maka lakon oportunidade hodi bá eskola tanba kestaun ekonomia no problema sosiál seluk tan.
“Ha’u ko’alia númeru ne’e bazeia ba dadus husi sensu 2010 nian ne’ebé fó sai husi not in employment, education, or training (NEET), tanba sensu 2015 nian dadus sira ne’e sei prelimináriu. Tan ne’e, haree ba sensu 2010 nian ha’u bele dehan ninia númeru bele aumenta tan,” dehan nia ba jornalista sira hafoin partisipa semináriu nasionál ba komemorasaun masakre Santa Cruz Dili ba dala 29 no loron nasionál juventude ba dala 15 ne’ebé hala’o iha salaun Delta Nova, ohin.
Notísia Relevante :CNJTL fó formasaun lideransa no edukasaun sidadania ba jovén sira
Mezmu nune’e, nia rekoñese dezenvolvimentu edukasaun komesa la’o di’ak tanba kada tinan universidade privada no públiku sira kontinua prodúz estudante graduadu sira purvolta rihun 15, maibé problema maka laiha kampu servisu hodi integra sira atu servisu hodi apoiu prosesu dezenvolvimentu nasionál.
Nia dehan tan atu kapasita foinsa’e sira maka CNJTL hahú 2010 to’o agora loke formasaun ba estudante universitáriu sira iha área inglés, portugués, sidadania, polítika públika no Information and communications technology (ICT) hamutuk ema 800-resin.
Notísia Relevante :Papél CNJTL mak hari’i sosiedade ida ativu no responsavel
Jornalista : Tomé Amado
Editór:Agapito dos Santos
