DILI, 10 novembru 2020 (TATOLI)—Prezidente Konsellu Kombatente Libertasaun Nasionál (KKLN), Vidal de Jesus ‘Riak Leman’ rekomenda Governu atu konstrui uma adekuadu ba veteranu sira tuir nesesidade.
“Ha’u haree dezeñu uma modelu hanesan de’it, bainhira ita halo uma barak iha fatin ida maibé veteranu sira la bá hela mós hanesan de’it. Di’ak liu Governu konstrui uma tuir veteranu ida-idak ninia hela fatin no nia hakarak tanba se la’e ita halo hamutuk iha fatin ida ema la bá hela, maibé animál mak ba hela ne’e ladún di’ak,” Veteranu Riak Leman tenik iha Palásiu Governu, tersa ne’e.
Tuir Prezidente KKLN, Governu konstrui uma ba veteranu sira iha munisípiu Manatuto no Lospalos, maibé veteranu la hela tanba distánsia dook hosi plantasaun liuliu to’os no atu hakiak animál sira.
Notísia Relevante: Governu sei harii uma ba veteranu hamutuk 117 pur etapa
Iha tinan 2020, Governu planu atu konstrui uma unidade 60 ba veteranu sira ne’ebé tinan 20 to’o 24 iha ai-laran no iha tinan 2021 konstrui tan uma 40 no restu sei tuir mai.
Tuir dadus, kombatente ne’ebé tama kritéria la to’o 100 tanba balun mate no barak liu mai husi Rejiaun I Lospalos, Rejiaun II Baucau no Viqueque inklui munisípiu sira seluk.
“Ami haree importante duni atu Governu konstrui uma adekuadu ba veteranu sira tanba hafoin funu, ita-nia gerilleiru sira tun husi foho no balun uma laiha no rai laiha, ne’ebé loron-loron ba halo to’os no haree animál hakiak hodi sustenta sira-nia moris,” nia akresenta.
Nune’e, Estadu iha responsabilidade atu konstrui uma adekuadu hodi trata veteranu nia moris ho dignu molok sira mate.
“Ami Konsellu Veteranu ho Governu sei kria ekipa ida atu tun kontrola ninia ezekusaun orsamentu ba konstrusaun uma ne’e bele ho dignu tuir veteranu nia hakarak,’’ Veteranu tinan 24 ne’e garante.
Antes ne’e, Governu liuhosi reuniaun Konsellu Ministru aprova projetu dekretu Governu kona-ba regulamentu apoiu finanseiru ne’ebé sei atribui ba kombatente veteranu libertasaun nasionál ida-idak.
Proposta ne’e aprezenta hosi Ministru Asuntu Kombatente no Libertasaun Nasionál, Júlio Sarmento da Costa ‘Meta Mali’, hodi fó apoiu $40.000 ba veteranu ida-idak ne’ebé tama kritéria tuir lei.
Apoiu ne’e hodi konstrui uma adekuadu no justu ba veteranu hamutuk 60 ba faze dahuluk ne’ebé korresponde ho totál orsamentu millaun $2,4.
Jornalista: Florêncio Miranda Ximenes
Editora: Julia Chatarina
