DILI, 11 novembru 2020 (TATOLI)—Xefe Departamentu Saúde Ambientál Ministériu Saúde, José Moniz, husu ba Timoroan hotu-hotu atu kontribui hodi prevene problema poluisaun suar iha Timor-Leste tanba risku ba saúde públika.
“Ita bele hanoin hamutuk atu bele fó informasaun ne’ebé maka di’ak atu ita bele hatene kle’an kona-ba polusaun ár, ne’ebé mak akontese iha ita-nia nasaun nafatin,” nia hateten asuntu ne’e durante programa konsultasaun kona-ba poluisaun suar ne’ebé hala’o iha Otél Novo Turizmu Dili, kuarta ne’e.
Nia husu entidade hotu-hotu presiza fó mós kontribuisaun liuhusi idea no sensibilizasaun informasaun ba komunidade hodi nune’e bele halo prevensaun iha futuru.
Tanba tuir dadus peskiza demográfiku saúde 2016 fó sai katak uma-kain 86% iha Timor-Leste sei uza kombustivél sólidu no pursentu 95 tein sei uza ai-maran.
Poluisaun suar ne’e afeta ba saúde públika, tanba tuir relatóriu Ministériu Saúde nian iha fulan-juñu 2020 rejista moras infesaun respiratóriu aguda hamutuk 330.854, ho kazu pneumonia hamutuk 12.632.
Nia dehan Ministériu Saúde iha ona polítika no estratejia atu redúz no prevene pasiente ho kazu infeksaun vias respiratóriu ka ISPA no moras seluk ne’ebé afetadu husi poluisaun ár.
”Timor-Leste rejistu moras barak liu maka ISPA ida ne’e as tebtebes no ida ne’e efeitu mai ita no ita hare’e fali ba problema seluk mak sirkulasaun karreta la kontraladu entaun nia prodúz ár, ne’ebé maka la ho kualidade tanba bele afeta tebes ita atu hetan moras lailais,” esplika Xefe Departamentu Saúde Ambiental, José Moniz.
Jornalista : Felicidade Ximenes
Editór:Agapito dos Santos
