DILI, 13 novembru 2020 (TATOLI)—VIII Governu Konstitusionál realiza tan seremónia asina akordu Santa Sé ho Konferénsia Episkopál Timor-oan (CET, sigla portugés) atu fó subvensaun públika ba igreja katólika Timor-Leste.
Primeiru-Ministru (PM), Taur Matan Ruak, hateten bazeia ba konkordata, Governu tau osan tinan-tinan ba CET no tinan 2020 Governu tau millaun $5.
“Governu iha previléjiu boot hakarak serbisu nafatin ho Konferénsia Episkopál iha dispozisaun tomak no saida de’it mak Governu bele ajuda atu kontribui hadi’a ita-nia transparénsia no responsabilizasaun. Governu prontu atu ajuda Konferénsia Episkopál iha jestaun rekursu finanseira,” Xefe Governu informa liuhosi ninia diskursu iha seremónia asina akordu ne’e iha Palásio Governu, sesta ne’e.
Nia dehan, ba oin Governu kompromete sei halo esforsu atu tau millaun $15 tuir mandatu ne’ebé iha konkordata.
Iha fatin hanesan, Prezidente CET, Don Norberto do Amaral, agradese Governu tanba maski ho situasaun difísil ho polítika no COVID-19, maibé ezekutivu sira sei iha fuan hodi aloka osan millaun $5 ba igreja.
“Bezeia ba akordu, osan sei aloka ba área edukasaun, sosiál no administrasaun ekleziál no akordu ne’e define mós regra ezekusaun inklui relatóriu hodi hato’o ba Governu,” Don Norberto do Amaral informa.
Nia hatutan, akordu subvensaun públika ne’e ba dala-tolu ona, ne’ebé dahuluk selebra iha mandatu VII Governu ho montante millaun $15, maibé igreja simu de’it millaun $6 no millaun $9 Governu atu utiliza hodi finansia obra sira ne’ebé iha.
Enkuantu akordu daruak ho valór millaun $10 ezekuta ona no relatóriu entrega ona ba Governu.
Akordu ne’e asina husi Prezidente CET no Primeiru-Ministru, ne’ebé asiste hosi Bispu na’in-rua (Don Vírgilio do Carmo da Silva, Don Basilio do Nascimento), reprezente Núnsiu Apostóliku iha Timór, Ministru Prezidénsia Konsellu Ministru Fidelis Manuel Leite Magalhães, Ministra Negósiu Estranjeiru no Kooperasaun Adaljiza Albertina Xavier Reis Magno, no Ministru Asuntu Parlamentár no Komunikasaun Sosiál Francisco Jerónimo.
Jornalista: Antónia Gusmão
Editora: Julia Chatarina
