DILI, 13 novembru 2020 (TATOLI)--Governu liuhosi Komisaun Administrasaun Fundu Infraestutura (KAFI) deside kria komisaun interministeriál atu halo tan verifikasaun no sertifikasaun ba projetu 44 ne’ebé seidauk iha kontratu husi projetu emerjénsia hamutuk 142.
Prezidente KAFI no atuál Vise Primeiru-Ministru no Ministru Planu no Ordenamentu, José Maria Reis, informa komisaun ne’e envolve Ministériu Obra Públiku (MOP), Ministériu Planu no Ordenamentu (MPO) no Ajénsia Dezenvolvimentu Nasionál (ADN).
“Ami tuur hamutuk ona atu buka solusaun ba projetu 44 ne’ebé laiha kontratu tanba ita tenke haree loloos atu fó solusaun ba kestaun ida-ne’e, tanba ne’e KAFI foti ona desizaun atu harii komisaun interminiteriál,” Vise PM hateten iha ámbitu audiénsia públika konjunta iha sala plenária Parlamentu Nasionál (PN), sesta ne’e.
Ministru Planu no Ordenamentu ne’e mós husu ba komisaun E (infraestrutura) hamutuk ho institiusaun relevante no ekipa sira atu tun ba terrenu atu justifika loloos projetu sira ne’ebé konsege sai polémika.
Tuir governante ne’e, problema sira ne’e hanesan erru ne’ebé presiza iha rezolusaun ruma, tanba ne’e Governu no Parlamentu tenke buka solusaun ba projetu emerjénsia sira-ne’e.
“Ha’u hanoin ita bele ejize duni última rezolusaun ba problema ne’e, atu ita labele loke dalan nafatin ba problema hanesan, tanba ita la fó sala mós ba emprezáriu sira maibé Governu mós tenke resposabiliza ba prosesu ne’e,” nia akresenta.
Parte seluk, KAFI deside la orsamenta projetu sira ne’ebé laiha kontratu liuliu projetu emerjénsia iha Orsamentu Jerál Estadu (OJE) 2020 tanba tuir Lei Jestaun Finanseira katak Governu bele orsamenta de’it ba kompromísu ne’ebé halo ona ho baze kontratu.
MOP hahú halo pagamentu iha 2018 ba projetu iha kontratu
Iha tinan 2018, MOP hahú halo pagamentu ba projetu 94 ne’ebe iha kontratu no progresu ho kustu $40.130.374,24 ne’ebé korresponde 46,50% pagamentu husi totál orsamentu iha kontratu ba pakote 94 hamutuk ho kustu $245.811.682.
Nune’e, iha 2019 kontinua halo pagamentu ho montante $67.947.639,30 no iha 2020 uza orsamentu duodésimu halo pagamentu $6.217.632,15.
MOP halo pagamentu bazeia ba kontratu no verifikasaun projetu, liuliu haree ba projetu fíziku ne’ebé iha kualidade no tuir dezeñu no Bill of Quantity (BOQ).
Pakote 44 ne’ebé seidauk iha kontratu, kompostu pakote estrada 31, ponte ho pakote haat no kontrolu cheia hamutuk sia ho orsamentu hamutuk $104.783.867.
Maski seidauk iha kontratu, maibé pakote 44 kontraktór balun serbisu ona iha terrenu to’o atinje 100%, enkuantu projetu balun sei atinje porsentu 4 to’o 85 no balun laiha obra fíziku.
Daudaun ne’e pakote ne’ebé laiha kontratu iha hela prosesu investigasaun Ministériu Públiku.
Molok halo pagamentu ba projetu 142, VIII Governu Konstitusionál liuhosi Gabinete Primeiru-Ministru (GPM) estabelese ekipa avaliasaun no levantamentu ba projetu, ne’ebé lidera husi GPM rasik.
Projetu emerjénsia 142 aprova husi KAFI iha 19 jullu 2017, atu implementa iha munisípiu 12, la inklui Rejiaun Administrativa Espesiál Oé-Cusse Ambeno (RAEOA).
Projetu ne’e rasik maioria konstrusaun no reabilitasaun estrada hamutuk 103, ponte hamutuk 8 no kontrolu cheia ka konstrusaun iha barajen 31 ho totál kustu $350.595.542,20.
Jornalista: Florêncio Miranda Ximenes
Editora: Julia Chatarina
