LAUTÉM, 13 novembru 2020 (TATOLI)—Komunidade suku Muapitine, Marcelo dos Santos, husu ba Ministériu Saúde (MS) atu koloka parteira iha suku ne’e, atu ajuda inan feton sira bainhira partu.
“Iha suku ne’e laiha parteira atu atende nesesidade hanesan inan isin rua no moras, estrada mós seidauk di’ak difikulta inan isin rua sira”, Marcelo dos Santos hateten liuhosi diálogu komunitária iha ámbitu vizita Sekretáriu Estadu Komunikasaun Sosiál, Merício Juvinal dos Reis ‘Akara’, sesta ne’e, iha suku Muapitine, postu administrativa Lospalos, munisípiu Lautém.
Nia haktuir, komunidade bainhria moras todan ka atu partu, tenke lori ba vila tula ho karreta ambulánsia ho kondisaun estrada ladún favorável.
“Husu ministériu relevante atu atende ami-nia preokupasaun, ami-nia suku iha aldeia lima,” nia akresenta.
Iha fatin hanesan, Sekretáriu Estadu Akara kompromete sei hato’o preokupasaun ne’e ba MS.
“Ita-nia orsamentu 2020 promulga ona no espera orsamentu 2021 bele pasa, nune’e ministériu kompetente bele tau konsiderasaun no bele koloka pesoál saúde. Husu komunidade Muapetine hein tanba imi-nia preokupasaun ha’u rejista no sei hato’o iha Ministra Saúde atu toma atensaun,” nia dehan.
Jornalista: Natalino Costa
Editora: Julia Chatarina
