DILI, 13 novembru 2020 (TATOLI)—Iha ámbitu seremónia graduasaun Kursu Formasaun Avansada ba Governasaun no Lideransa Estratéjika (GFAGLE, sigla portugés) ne’ebé realiza husi Institutu Defeza Nasionál (IDN), Primeiru-Ministru (PM), Taur Matan Ruak, husu ba formandu hamutuk na’in-150 atu partilla esperiénsia ho ema seluk.
“Matéria ne’ebé hetan labele rai no subar de’it, maibé tenke partilla ho ema seluk iha serbisu fatin hodi kontribui dezenvolvimentu nasaun. Ha’u hakarak agradese ba diretór jerál no formandu sira hotu ninia pasiénsia no dedikasaun,” Xefe Governu apela bainhira halo intervensaun iha seremónia, iha salaun Ministériu Finansa, Aitarak-laran, sesta ne’e.
Biban ne’e, Xefe Ezekutivu felisita formandu sira no espera ho koñesimentu bele ajuda nasaun ba oin ho rekursu umanu ne’ebé kualifikadu hodi serví povu no nasaun ho di’ak no dignu.
Relasiona ho matéria, PM toka oituan iha Estadu, nasaun estratéjika no polítika públika tanba nia rasik iha esperiénsia no intende integrasaun husi aspeitu ida ba seluk, liga ho situasaun nasionál, rejionál no mundu.
“Ita halo buat ida labele hateke de’it ba ita-nia fatin, maibé presiza haree ambiente internasionál. Husu entidade Estadu sira atu aplika kooperasaun tanba dezde moris mai kooperasaun ne’e ejizte nanis ona,” nia hatutan.
Xefe Governu konsidera, ho kooperasaun mak bele atinje objetivu, tanba ne’e maka ejize atu koopera entre ema, tanba ho kooperasaun mak hamosu organizasaun no iha dezempeñu.
“Dezempeñu ne’e iha kritériu lubuk ida, kuandu ita-tau atensaun ba sentidu diresaun no tarefa sira ne’ebé importante, tenke halo bainhira hakarak organizasaun ne’e kumpre buat ne’ebé justifika ninia ezisténsia,” Taur esklarese.
Iha sistema koordenasaun ko’alia mós kona-ba nível ierarkia no oinsá maka koordena husi vertikal no orizontál, tanba ne’e nu’udar líder tenke intende ba kestaun ne’e, ema ne’ebé serbisu iha instituisaun ida tenke iha espíritu ekipa forte.
Nune’e mós, estabilidade organizasionál ko’alia kona-ba relasaun traballu entre xefia no funsionáriu tanba iha organizasaun nível koñesementu la hanesan.
“Nível esperiénsia dala barak ho egoista, maibé hotu-hotu ninia papél hanesan servidór Estadu, entaun relasaun ema nian mak fó estabilidade ba dezenvolvimentu institusionál no kondisiona, fasilita no kontribui ba dezempeñu.
Xefe Ezekutivu ne’e dehan, nu’udar servidór ida tenke iha sentidu lealdade no pertense katak sente na’in ba rai ida-ne’e.
Enkuantu formandu CFAGLEhamutuk na’in-150, kompostu husi na’in-50 kargu xefia husi diretór jerál, inspetór jerál, no formandu na’in-100 mai husi diretór nasionál hosi liña ministeriál sira ne’ebé hala’o sira-nia kna’ar nu’udar téniku profisionál.
Kursu CFAGLE, IDN realiza ona desde fulan-jullu no ramata iha outubru 2020, ne’ebé fahe ba turma tolu.
Partisipante iha seremónia ne’e mai husi Sivíl no Militár, membru Governu balun, inklui entidade seluk tan.
Jornalista: Antónia Gusmão
Editora: Julia Chatarina
