DILI, 14 novembru 2020 (TATOLI)—Xefe suku Muapetine, Lívio Mendes, husu ba Ministériu Obra Públika (MOP) no Institutu Jestaun Ekipamentu (IGE, sigla portugés) atu kontinua tau-matan iha ponte suku, ne’ebé halo konetividade entre komunidade Muapitine ba Tutuala, Mehara no Com.
“Ami husu finansimentu oituan ba Governu atu hadi’a ponte tanba foin daudaun veteranu, komunidade hamutuk ho autoridade suku hola besi iha lori mai no agora sei rai, tanba ne’e ami husu kontinua tau matan, nune’e hafasil konetividade komunidade sira bá-mai,” Líder komunitáriu ne’e dehan iha diálogu komunitáriu, iha ámbitu vizita Sekretáriu Estadu Komunikasaun Sosiál, Merício Juvinal dos Reis ‘Akara’, sábadu ne’e, iha suku Muapetine, postu administrativu Lospalos villa, munisípiu Lautém.
Maski nune’e, nia apresia servisu MOP no IGE tanba bele aterru ona dalan husi suku Muapetine bá Lospalos villa.
“Nu’udar líder komunitáriu, agradese ba instituisaun Estadu tanba bele atende problema komunidade ne’ebé enfrenta iha tinan barak nia laran,” nia tenik.
Nia konsidera, asaun instituisaun rua hatudu katak Governu iha vontade hodi responde nesesidade povu.
”Governu ida-ne’e la taka matan ba povu nia problema, espera sira sei tau-matan ba povu-nia problema seluk,” nia akresenta.
Jornalista: Natalino Costa
Editora: Julia Chatarina
