DILI, 16 novembru 2020 (TATOLI)—Ministru Edukasaun Juventude no Desportu (MEJD), Armindo Maia, deklara nia parte sei fó oportunidade ba estudante finalista hamutuk ema na’in 30 hus Eskola Ensinu Sekundária Jerál-Taur Matan Ruak Baucau atu tuir ezame nasionál(EN) faze daruak.
Ministru Edukasaun Juventude no Desportu (MEJD) Armindo Maia orienta ona diretór munisípiu sira atu prosesa dadus estudante 30 iha eskola ne’e, nune’e bele hetan fali sira nia direitu hodi partisipa iha Ezame Nasionál tanba iha tinan 2019 liubá la hetan autorizasaun husi Governu tanba eskola ne’e taka tiha.
Notísia Relevante:MEJD enkoraja estudante sira hakaas-an iha ezame nasionál
“Ita buka rezolve ho intensaun atu salva destinu estudante finalista na’in 30 ne’ebé tinan kotuk la hetan direitu iha Ezame Nasionál, depois mak ita sei foti medidas, naran katak sira tuir uluk lai Ezame Nasionál. Tanba, ita lakohi prejudika estudante sira ninia futuru,” nia informa ba jornalista sira iha Eskola Sekundária Sagradu Coração de Jesus Becora, Segunda ne’e.
Governante ne’e husu ba dirijente sira hotu ne’ebé tutela ba dirasaun ensinu sekundáriu atu bele trata estudante sira ho didi’ak hodi bele tuir fali ezame nasionál.
Nia mós konsidera estudante sira ne’e, sai vítima ba interese pesoál husi dirijente eskola sira nian, tanba ne’e Governu liuhusi desizaun MEJD hatun ona despaixu ida hodi taka ofisilamente eskola ne’e.
“Ha’u fó ona orientasaun atu prosesa estudante sira ne’e, nune’e integra iha eskola ne’ebé de’it atu sira bele tuir fali ezame nasionál,” tenik Ministru Armindo.
Entertantu, Diretór Jerál Ensinu Sekundáriu, Deolindo da Cruz, hateten oras ne’e daudaun hamutuk ho dirijente Servisu Edukasaun Munisípiu Baucau, prosesa hela dokumentu husi estudante na’in 30 nune’e bele tuir ezame nasionál iha faze tuirmai.
“Tuir loloos Eskola ESJ-TMR Baucau iha estudante na’in 38, maibé na’in 30 de’it mak hatama dokumentu, no na’in ualu seluk to’o agora la mosu. Tanba ne’e, ministériu prosesa ona dokumentu estudante na’in 30 nian de’it,” nia informa.
Notísia Relevante:Estudante finalista husi Munisípiu rua preparadu tuir ezame nasionál
Jornalista: Tomé Amado
Editór: Agapito dos Santos
