DILI, 16 novembru 2020 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, informa daudaun ne’e Konsellu Jerál Universidade Nasionál Timor Lorosa’e (UNTL) simu ona aplikasaun husi kandidatu hamutuk na’in ualu atu konkore vaga Reitór UNTL.
Tuir estatutu UNTL ne’ebé hatuur iha dekretu lei númeru 16/2010 artigu 21 fó kompotensia ba Konsellu Jerál UNTL atu asume responsabilidade hodi halo rekrutamentu ka nomeasaun ba kargu reitór foun.
Governante dehan bainhira Konsellu Jerál UNTL finaliza ona prosesu nomesaun ne’e maka MESSK sei kontinua aprezenta ba Konsellu Ministru hodi hetan apresiasaun.
“Hanesan ministru ha’u hein de’it ninia rezultadu nomeasaun ne’e mai mak ha’u sei aprezenta ba Konsellu Ministru hodi hetan apresiasaun,” nia dehan iha Edifísiu Ministériu Solidaridade Sosiál no Inkluzaun (MSSI), Caicoli Dili, segunda (16/11).
Reitór UNTL atuál Francisco Miguel Martins, ninia mandatu sei ramata iha tempu badak tanba ne’e presiza atu halo nomesaun ka rekrutamentu foun hodi subtitui filafali.
Jornalista : Tomé Amado
Editór :Agapito dos Santos
