GLENO, 18 novembru 2020 (TATOLI)--Ministra Saúde (MS), Odete Maria Freitas, hateten má-nutrisaun kontinua aas iha Munisípiu tolu mak hanesan Ermera, Bobonaro no Rejiaun Administrativa Espesiál Óe-cusse Ambeno (RAEOA).
Notísia Relevante: Populasaun Ermera simu PR Lú Olo nia komitiva ho entusiazmu
“Relatóriu ne’ebé mak iha má-nutrisaun mantein nafatin kontinua aas iha munispiu tolu mak Ermera, Bobonaro, RAEOA no iha mós munisipiu seluk. Maibé munisípiu tolu ne’e maka ita haree ba sei aas hela,” Ministra Saúde, Odete Maria Freitas, hateten ba jornalista sira iha Gleno, kuarta ne’e.
Kona-ba politika atu hamenus má-nutrisaun, Ministra hateten, iha esforsu balun ne’ebé mak hahú halo ona mak kontinua servisu hamutuk atu fahe batar uut no fahe informasaun saúde ba komunidade sira.
Tuir nia, presiza haforsa liután informasaun saúde ba komunidade sira tanba má-nutrisaun akontese tanba dala ruma ai-han ba prevene má-nutrisaun ne’e iha hela maibé dala barak família seidauk hatene.
Governante ne’e hatutan, trajetu informasaun saúde ne’e barak liu fó ba inan isin-rua sira oinsá mak bele prepara hahan no han hahan sira-ne’ebé iha nutrisaun.
“Fo informasun saúde ba inan sira atu oinsá mak prepara ai-han parte seluk seguransa ai-han. Fatór barak mak iha. Dalaruma ai-han iha maibé parte família mak seidauk hatene prepara ai-han ba família sira,” nia dehan.
Nia hateten, promosaun saúde ne’e liuliu programa ba inan isin-rua no promove inan sira-ne’ebé mak prontu hakarak iha oan tenke iha nutrisaun.
Jornalista: Osória Marques
Editór: Cancio Ximenes
